5 қарашада Қазақстанға екі мәртебелі мейман келеді

Қазақстанға Қасым-Жомарт Тоқаевтың шақыруымен Иордания королі мен Тәжікстан президенті келеді, деп хабарлайды мемлекет басшысының баспасөз хатшысына сілтеме жасаған KAZ.NUR.KZ.

Президенттің кеңесшісі – баспасөз хатшысы Айбек Смадияровтың хабарлауынша, ертең Қазақстанға Иордания королі II Абдалла бен әл-Хусейн мен Тәжікстан басшысы Эмомали Рахмон ресми сапармен келеді.

Мәртебелі меймандарды елімізге президент Қасым-Жомарт Тоқаев шақырған. Иордания королі II Абдалла бен әл-Хусейн Қазақстанда 5-6 қараша аралығында сапармен болады.

"Жоғары деңгейдегі келіссөздер барысында сауда-экономикалық, инвестициялық және мәдени-гуманитарлық салалардағы екіжақты ынтымақтастықты кеңейту перспективасы талқыланады", - делінген хабарламада.

Эмомали Рахмонның Қазақстанға сапары 5-7 қараша күндеріне жоспарланған.

"Екі елдің көшбасшылары стратегиялық әріптестік пен одақтастық қатынастарды нығайту мәселелерін қарастырады", - делінген хабарламада.

6 қарашада Астанада Ақаба процесі саммиті өтеді. Жиынға бірқатар мемлекеттің басшылары қатысады.

Мәтіннен қате тапсаңыз, бізге жазыңыз