Тәртіп сақшыларының үстінен шағымданған Кенталға Алматы полициясы жауап қатты

Алматы қаласының тәртіп сақшылары танымал әнші Кентал түсірген вайнға қатысты мәлімдеме жасады деп хабарлайды KAZ.NUR.KZ polisia.kz-ке сілтеме жасап.

Алматы Полиция департаменті әлеуметтік желілерді бақылау кезінде полиция қызметкері бейнесіндегі ер адамның видеосын байқаған.

Желіде тараған видеодан полиция қызметкері образындағы ер адамның "Бәріңе сәлем, достар! Кім күйзеліске душар болса, жүрегі ауырса, жұмыста, отбасында қиындықтар туындаған болса, біреуді несие қинаса. Уайымдамаңыз. Бәрібір барлығымыз да өлеміз" деп айтқанын естуге болады.

Тексеру кезінде жазба авторының әнші әрі актер Талғат Кенжеболатов (Кентал) екені анықталған.

Тәртіп сақшылары әлеуметтік желіде жарияланған пост полицияға қарсы халықтың наразылығы мен түсініспеушілігін тудырғанын білдірді.

"Алматы полициясы бұл роликтегі полиция формасындағы ер адам іс жүзінде ішкі істер органдарының қызметкері емес. Талғат Кенжеболатовтың іс-әрекетіне қатысты жүргізілген тексеру нәтижелері бойынша құқықтық баға беріледі. Қазақстанда коронавирус инфекцияның таралуына және қайғылы оқиғаларға байланысты қалыптасқан жағдай аясында бұндай үндеулер, тіпті әзіл үшін болса да, әсіресе полиция формасын қолданғандығы орынды емес және қабылданбайды", - деп түсіндірді мегаполистің полиция департаменті.

Еске сала кетсек, Кентал лақап атымен танылған отандық әнші құқық қорғау қызметкерлері өзін үйінен алып кетіп, бөлімшеге апарғанын жеткізген болатын.

Оған өнер иесінің төрт жыл бұрын түсірген видеосы себеп болған.

Мәтіннен қате тапсаңыз, бізге жазыңыз