Қазақстандық музыкант Сеулде өнерімен елді таңғалдырды

Қазақстандық музыкант Сеул сахнасын бағындырды. Белгілі виолончелист Эльдар Сапараев пен Кореяның маңдайалды скрипкашысы Эдвин Кимнің бірлескен  концерті үлкен қошеметпен өтті, деп хабарлайды 24KZ.

Кештің басты оқиғасы Иоганнес Брамстың монументалды Қос концертін орындау болды. Толассыз күш-қуатты талап ететін туынды мінсіз орындалды. 

"Бұл менің ең сүйікті шығармаларымның бірі. Брамс тек виолончельге арналған жеке концерт жазған жоқ, ол  виолончель мен скрипканы үндестіре білді.  Бұл әйел мен еркек жанының түйісуі секілді! Өзі өмір бойы ерекше жақсы көрген әйел – Клара Шуманға деген сезімін осылай жеткізеді. Музыка арқылы ғасырлар бойы бізге берілген осы эмоцияларды бастан кешудің жөні бір бөлек, - дейді виолончелист Эльдар Сапараев.

Музыканттың әріптестері оның өнері туралы жақсы пікірде.

"Эльдар – керемет виолончелист. Жүрегі суық адам ешқашан жылы музыка орындай алмайды, ал Эльдардың бойында оразан зор жылылық пен қуатты энергия бар. Ол маған өлшеусіз шабыт сыйлайды, мен оны әріптес ретінде өте қатты сыйлаймын. Маған Қазақстан қызықты көрінеді. Себебі онда біздің қандастарымыз – корейлер көп тұрады, сондықтан сіздің елде концерт берсем деген  ниетім бар", - дейді скрипкашы Эдвин Ким.

Концерт онлайн көрсетіліп, экран алдына орасан зор аудитория жинады, ал залдың ішінде отырып, тамашалағандар таңданыстарын жасыра алмады. 

"Қазақстаннан келген виолончелист Сапараевтың өнерін тұңғыш рет тыңдап тұрмын. Ол шексіз музыкалық талғамы бар көрнекті орындаушы. Брамстың қос концертін үлкен ләззатпен тыңдадым – оның орындау мәнері біздің маңдайалды скрипкашымыз Эдвин Кимнің шеберлігімен тамаша үндесіп тұр", - дейді музыкант Ким Гван Хун.

Беделді Любляна университетінің профессоры Эльдар Қазақстаннан шыққан талантты жастарды белсенді  қолдап жүр. Бүгінде оның сыныбында Батырхан Иссак, Данагүл Әжікенова және Юранай Сайран атты үш студент оқиды. 

"Батырхан осы 2 жылдың ішінде бірнеше үлкен байқауда жеңіске жетті. Данагүл үшін біз басқа бағытты таңдадық. Яғни Батырхан солист ретінде барса, Данагүл оркестрлерде ойнауы үшін көбірек жұмыс істейміз және ол қазірдің өзінде жеке де, сондай-ақ Дмитрий Ситковецкиймен бірге оркестрде де өнер көрсетіп үлгерді. Кейін Эдуард Шмидердің оркестрінде ойнады", - дейді виолончелист Эльдар Сапараев.

Қазақстандық музыкант әлем жұртшылығын бағындыруды жалғастыруда. Жақын арада ол Люблянада Еуропаның ірі фестивальдерінің бірінде үш концерт беріп, содан кейін Штутгарт филармониялық оркестрімен Германияға турнеге аттанады.

Мәтіннен қате тапсаңыз,бізге жазыңыз