Том Круз түскен "Диггер" фильмі әлемдік прокатта сәтсіздікке ұшырап, алғашқы аптада 8 млн доллар жинады

Variety басылымының хабарлауынша, режиссер Алехандро Иньярритудың 160 млн доллар бюджетке түсірілген қара комедиясы кассалық көрсеткіш бойынша сәтсіздікке ұшырады, деп жазды KAZ.NUR.KZ.

Басты рөлде Том Круз ойнаған "Диггер" қара комедиясы әлемдік кинопрокат тарихындағы ең нашар көрсеткіштердің бірін тіркеді. Режиссер Алехандро Гонсалес Иньярритудың туындысы Солтүстік Америкадағы алғашқы демалыс күндері небәрі 8 млн доллар жинап, кассалық рейтингте бесінші орынға табан тіреді. Халықаралық нарықта фильм 73 елде 12 млн доллар жинап, жалпы бастапқы түсімі 20 млн долларды құрады.

Картинаның өндірістік бюджеті 160-тан 180 млн долларға дейін жетсе, жаһандық маркетингтік науқанға жұмсалған шығын 100 млн доллардан асты. Сала сарапшылары мен талдаушылардың бағалауынша, жобаның өзін-өзі ақтауы үшін 300-350 млн доллар қажет. Қазіргі көрсеткіштерді ескерсек, Warner Bros. студиясының бұл фильмі жасаушыларға 150-ден 200 млн долларға дейін шығын әкелуі мүмкін. Студия үшін жағдайды Том Круздың өндірістік шығындар жабылғанға дейін кассалық түсімнен пайыз алатыны қиындатып отыр.

"Диггер" фильмінің сюжеті ауқымды экологиялық апатқа дайындалып жатқан ықпалды мұнай магнаты туралы баяндайды. Franchise Re сарапшысы Дэвид А. Гросс қара комедиялар әдетте арзан жобалар болатынын, ал Том Круз қатысқан жоғары бюджеттік фильм кемінде 40 млн доллармен басталуы керек екенін атап өтті. Сыншылар мен көрермендер картинаны жағымсыз және түсініксіз деп бағалап, салқын қабылдады. Warner Bros. студиясы жағымсыз пікірлерді маркетингте пайдаланып, көрермендерді өз пікірін қалыптастыруға шақырғанымен, бұл аудиторияны кинотеатрларға тартуға көмектеспеді.

Мәтіннен қате тапсаңыз, бізге жазыңыз