"Сот болады": Жұлдыз Әбдікәрімова заңгерлерден көмек сұрап, дабыл қақты
Жарияланған күні:

Отандық актриса Жұлдыз Әбдікәрімова өз танысымен соттасатынын мәлімдеді. Өнер иесі Instagram желісіндегі парақшасында заңгерлерден көмек сұрады, деп жазады KAZ.NUR.KZ.
Актрисаның айтуынша, танысы оның сеніміне кіріп, бірқатар құжатқа қол қойдырып алған. Ал қазір ол сотқа ықпал етуі мүмкін.
"Сот болады. Менің қорғаушыларым қобалжулы. Қарсы тарап таныс-тамырларын қосып, сотқа ықпал етпекке әрекет етіп жатыр екен. Қанша жерден дөкейлерін қосып, тырнағын батырғысы келсе де, мен әділ сотқа сенемін", - деді ол.
Өнер иесі кіммен не үшін соттасқалы жатқанын алдағы уақытта жариялайтынын айтты. Әзірге ол желідегі заңгерлерден көмек сұрап отыр.
"Бәлкім, араларыңызда заңгерлер болса, кеңес берерсіздер. Заңгер, қорғаушы болсаңыз, менің сотым ашық өтсе, келіп қатысасыз ба?", - деп жазды актриса.
Жұлдыз Әбдікәрімова сотқа қатысты ақпаратты жарияламас бұрын заңгерлерімен ақылдасып алмақ. Айтуынша, оның қазіргі бар үміті оқырмандарында.

Еске сала кетейік, осыған дейін Жұлдыз Әбдікәрімова бірнеше жыл бұрын танысы сеніміне кіріп, бірқатар құжатқа қол қойдырып алғанын айтқан еді. Актриса алдағы уақытта онымен кездесетінін, мәселе шешілмесе, сотқа жүгінетінін жеткізген болатын.
Мақаланың түпнұсқасы: https://kaz.nur.kz/showbiz/personal-life/2166612-sot-bolady-zhuldyz-abdikarimova-zanggerlerden-komek-surap-dabyl-qaqty/