Тейлор Свифттің Беверли-Хиллздегі бұрынғы зәулім үйі 8 миллион долларға сатылымға шықты

PageSix басылымының жазуынша, әнші бұл үйінде "1989" альбомын жазған, ал қазіргі иелері интерьерді жаңартып, Кэлвин Харрис отырғызған ағашты сақтап қалған, деп хабарлады KAZ.NUR.KZ.

Америкалық әнші Тейлор Свифттің Беверли-Хиллздегі бұрынғы үйі қайтадан жылжымайтын мүлік нарығына шықты, деп хабарлайды Page Six басылымы. Үйдің қазіргі иелері – сән дизайнері Николя Бижан мен оның жұбайы, интерьер дизайнері Рокси Бижан тарихи нысанды 7,995 миллион долларға сатпақ.

Свифт "Пиллсбери Эстейт" деген атпен белгілі бұл үйді 2011 жылы шамамен 3,55 миллион долларға сатып алған. Әнші осы зәулім үйде өзінің танымал "1989" поп-альбомына арналған материалдарды жасап, Vogue журналына арналған әйгілі бейнеинтервьюін түсірген. 2018 жылы әртіс нысанды Бижан жұбайларына сатты. Жаңа иелері 1927 жылы салынған ғимараттың тарихи сипатын сақтай отырып, ауқымды реконструкция жүргізді.

Аумағы 1,5 акр болатын жер телімінде үш жатын бөлмесі бар негізгі үй мен жеке қонақ үй орналасқан. Бақшада әншінің бұрынғы жігіті, музыкант Кэлвин Харрис отырғызған зәйтүн ағашы әлі күнге дейін өсіп тұр. Николя Бижан үйдің шығармашылық атмосферасы оны Свифттің бұрынғы жұмыс кабинетінде өз NB44 сән брендін іске қосуға шабыттандырғанын атап өтті. Сондай-ақ ерлі-зайыптылар 2020 жылы осы үйдің аумағында үйлену тойын өткізген.

Мәтіннен қате тапсаңыз, бізге жазыңыз