"Басымды иемін": Әміржан Қосанов Зайытовқа қатысты ойын білдірді

Жазда өткен президенттік сайлауда кандидат болған оппозиция өкілі Әміржан Қосанов айтыскер ақын Ринат Зайытовқа қатысты ойын айтты. Бұл туралы "Еуразия" бірінші арнасына сілтеме жасаған KAZ.NUR.KZ хабарлайды.

9 маусым күні президенттік сайлауда дауыс беру нәтижесі түпкілікті жарияланбай жатып жеңілісін мойындап, оппонентін құтықтаған Қосанов көпшіліктің сынына қалған еді.

Сол уақытта саясаткерге назын айтып, сенімді ақтамады деп налығандардың бірі Ринат Зайытов болатын.

Одан басқа, әлеуметтік желіде де кандидатқа ренішін білдіргендер қатары көп болған.

Жаңа президент билікке орнығып, елдегі жағдай қалыпқа келген соң Әміржан Қосанов айтыскерге қатысты пікірін ашық айтты. Ол Ринат Зайытовтың азаматтық пікірін қолдайтынын жеткізді.

"Ринат Зайытовқа ризамын. Оның азаматтық парызына, сол кезде шырылдап жүргеніне ризамын. Басымды иемін. Бәлкім, менің сайлау нәтижесін мойындауым, елді, тыныштықты ойлап, әлі де біздің Қазақстан оппозициясының дәл сондай дүлей күш емес екендігін мойындағаным біраз адамды ренжіткен шығар. Мен сол адамдардың алдында бас иемін. Көзқарасым дұрыс", - деді ол.

Мәтіннен қате тапсаңыз, бізге жазыңыз