Ернар Айдар тергеуде: Әншінің ұсталуына қатысты тың мәлімет белгілі болды

Отандық танымал әнші Ернар Айдар 23 сәуірде күллі Қазақстанды шулатқан болатын. Бір бөлмеде он екі адаммен жиналып, онлайн түрде ұтыс ойнатқан өнер иесін ТЖ режимін бұзғаны үшін полицейлер құрықтады. Бүгінде тергеліп жатқан әртістің ұсталуы мен оның ұйымдастырған конкурсына қатысты тың мәлімет белгілі болды деп хабарлайды KAZ.NUR.KZ "Астарлы ақиқат" бағдарламасына сілтеме жасап.

Бағдарлама редакциясы ел арасында қызу талқыға түскен оқиғаға байланысты журналистік зерттеу жүргізіп, әнші ұйымдастырған ұтысқа қатысты бірқатар тың жайтты анықтаған.

Мәселен, Ернар Айдардың конкурсына арналған ресми парақша бұзылды деген сылтаумен төрт рет жаңартылған. Ал, ұтыстың жарнамалық роликтері бес мәрте түсіріледі.

Сонымен қатар, аталмыш видеолардағы қымбат машиналар да ауысып тұрған. Әр бейнероликтегі темір тұлпарлардың әр түрлі екенін аңғаруға болады.

"Астарлы ақиқат" редакторлары ұтысқа тігілген «Лэнд Крузердің» бірін іздеп тауып, оның видео үшін жалға алынғанын анықтады.

Оған қоса, конкурстың басты сыйлығы зәулім пәтер де екі рет өзгертілген болып шықты.

Бағдарлама барысында оның жүргізушісі Дина Төлепберген Ернар Айдар өткізген ұтыстың жеңімпаздарына хабарласып көрді. Алайда, әншінің тікелей эфирінде бағалы сыйлықтарды иеленген адамдардың барлығының ұялы телефондары сөндірулі болып шықты.

Айта кетейік, Ернар Айдар мен онымен бір бөлмеде болған он екі адамды ұстау операциясын экономикалық қылмыстарды тергеу департаменті жүргізген болатын.

Сонымен қатар, бағдарлама барысында Ернар Айдар конкурсын өткізу үшін бірыңғай лоторея операторынан тиісті рұқсатты алмағаны белгілі болды.

Ең маңызды әрі қызықты жаңалықтарды біздің Instagram парақшамыздан оқыңыздар>>

Мәтіннен қате тапсаңыз, бізге жазыңыз