Долли Партонның менеджері әншінің жұмыстан шығарылған жиеніне қатысты тыйым салу ордерін беруді талап етті

Дэнни Нозелл Брайан Сивердің қоқан-лоқы көрсетуіне байланысты Нэшвилл сотына жүгінді. Variety басылымының хабарлауынша, күзет қызметінің бұрынғы басшысы марқұм әртістің бизнесіне зиян келтірген, деп жазды KAZ.NUR.KZ.

Марқұм кантри-әнші Долли Партонның менеджері Дэнни Нозелл мен She's Alive, LLC компаниясы әртістің жиені Брайан Сиверге қатысты тыйым салу ордерін беруді талап етіп, сотқа шағым түсірді. Бұған дейін әншінің қауіпсіздік қызметін басқарған Сивер 15 қыркүйекте жұмыстан босатылған болатын. Талапкерлердің мәліметінше, ол жұмыстан шыққаннан кейін компания қызметкерлеріне, заңгерлерге және іскер серіктестерге қоқан-лоқы көрсететін хабарламалар жіберіп, Партонның мұрасынан ақша бопсалауға тырысқан.

Сот құжаттарында Сивердің әншінің "бүкіл брендін жоямын" деп қорқытқаны және оның Dollywood ойын-сауық саябағын қоса алғандағы бизнес нысандарына зиян келтіремін деп сес көрсеткені жазылған. Сондай-ақ ол қаруға қолжетімділігі бар екенін және жалдамалы жұмыс тәжірибесі барын айтып, өзін "өлтіруші" деп атаған әрі беделге нұқсан келтіретін подкаст шығаруға уәде берген. Сивердің әрекеттеріне байланысты Партонның сенімгерлік меншік мәселелері жөніндегі адвокаты қызметінен кетті, ал компания қызметкерлерінің бір бөлігі өміріне қауіп төнгендіктен жұмыстан шықты немесе қашықтан жұмыс істеу режиміне ауысты.

Нэшвилл соты уақытша тыйым салу ордерін қанағаттандырып, Сиверге компания қызметкерлеріне, серіктестеріне және кеңселеріне 400 метрден (1000 фут) жақын қашықтыққа жоламауды бұйырды. Сивердің өзі журналистерге берген жауабында мәтіндік хабарламаларының контекстен үзіп алынғанын және олардың қайғылы кезеңде жазылған жеке хат алмасулар екенін мәлімдеді.

Мәтіннен қате тапсаңыз, бізге жазыңыз