Қызылорда: Бір ауланың ішінде 50 әжетханасы бар тұрғындардың жағдайы жұртты шошытты (фото)

NUR.KZ порталының 8 747 535 12 98 WhatsApp нөміріне Қызылорда қаласы, Шанхай ауданындағы бес қабатты үйдің тұрғындары хабарласып, адам шошырлық жағдайда өмір сүріп жатқандарын жеткізді. Жергілікті биліктен көмек күтіп шаршағандар қайда барып паналарын білмей отыр.

Бауыржан Момышұлы көшесіндегі 76-үй бұрындары жатақхана болған екен. Қалада өмір сүріп жатқан аты болмаса, мұндағы тұрғындар даладағы әжетханаға барып, суды да даладан тасып ішеді.

"Далада шүмектен ағып тұрған суға жұрт кірін де жуады, жазда тіпті, сол жерде жуынып жатады. Газ кірмеген, әжетхана кірмеген. Осындағы 50 үйге айналамызда 50 әжетхана бар. Балалар соның арасында, кейде үстіне шығып ойнайды", - деп ашынды тұрғындар.

Айтуларынша, олар жергілікті биліктен көмек күтіп шаршаған. Үйге келіп, жағдаймен танысып кеткені болмаса, әлі күнге дейін ешбір шара қабылдамапты.

"Бесінші қабаттағы пәтерден қыс пен көктем мезгілінде су тоқтамай тамып тұрады. Пәтерлер әбден көгерген. Ол аздай, 3-4 жылдан бері қандаламен алысып әлекпіз. Әсіресе, мұндағы кішкентай балаларға обал. Нәрестелерді бесікке салсақ, баланың дымын қалдырмай шағып тастайды", - дейді олар.

Жаман да болса, жалғыз баспанасын жыл сайын қолдарынан келгенше жамап-жапсырып отырған тұрғындар биліктен тағы да үміттене көмек сұрады.

"Жыл сайын келіп, модернизациялаймыз деп айтады. Бірақ нәтиже шықпай келеді. Қабырғаларымыз үгітіліп тұр. Осыған көңіл бөліп, бір шешім шығарсаңыздар", - деп өтінді тұрғындар.

Бізбен бөлісер қызықты әрі маңызды жаңалығыңыз болса, NUR.KZ порталының WhatsApp нөміріне жолдаңыз: + 7 747 535 12 98