Мешітті тегін тазалап жүрген қазақ қызына мейірімді жандар көлік сыйлады (фото)

Қасиетті Ораза айт мерекесінде Жетісу жұртшылығы мешітті тегін тазалап жүрген келіншекке көлік мінгізді деп хабарлайды 31 арна.

Көлік Қадір түнінде садақа ретінде жиналған қаржыға сатып алынды. Құны 700 мың теңге тұратын темір тұлпардың кілті Земфира Нұралбековаға көпшілік алдында табысталды.

Рамазан айында аспаздың қызметін атқарып, аумағы төрт жарым мың шаршы метрлік мешіт ғимаратын біраз уақыттан бері тегін тазалап жүрген әйелге көлік мінгізу туралы идеяны жас қарилар көтерген екен.

Бұл осы уақытқа дейін тарауық оқыған қарилар мен мешітте жатып білім алатын шәкірттердің ас-суын қамдап, сауабын алған жанға деген сыйлары болып шықты.

Қадір түнінде өздерінің қызметіне деп жұрт жинаған садақаны түгелімен беруге уағдаласқан қарилардың бастамасын имамдар қолдаған.

Мешіттің тұрақты жамағаты да сауапты іске ортақтасып, қолдарынан келгенше жәрдемдесіпті.

Халықтың разылығына бөленген Земфира Нұралбекованың отбасы Талдықорған шетіндегі ауылда тұрады. Отағасы екеуі үш бала тәрбиелеп отырған ана енді жеке көлігімен мешітке қатынайтын болады.

"Осында жатқан имам кісілер бір қуантқысы келген екен. Ол кісілерге Алла разы болсын. Алладан қайтсын, барлықтарыңызға Алла осындай жақсылық нәсіп ете берсін", - дейді көлік иесі.

Жаңалығыңыз болса, порталдың WhatsApp нөміріне жолдаңыз: + 7 747 535 12 98

Мәтіннен қате тапсаңыз, бізге жазыңыз