"Далада қалатын түрім бар": Арыста үйлері әлі жөнделмеген тұрғындар жанайқайын айтты
Опубликовано:
Арыста құрылысы бітпек түгілі, әлі басталмаған үйлер де бар болып шықты. Себебі, үй иелерінің бірқатары жөндеу жұмыстарының түрімен келіспей отыр деп хабарлайды өңірдегі KAZ.NUR.KZ тілшісі.
![Коллаж: KAZ.NUR.KZ Коллаж: KAZ.NUR.KZ](https://cdn.nur.kz/images/1120/787b1a7474c340da_w.jpeg)
Арыстық қария Мұхтар Досжановтың үйіне жарылыс әжептеуір зақым келтірген. Түркістан облысына тиесілі секторда орналасқан баспанасына жауаптылар алғашында күрделі жөндеуден өткізіп береміз деген. Алайда 63 жастағы тұрғын онымен келіспепті.
![Мұхтар Досжанов. Фото: KAZ.NUR.KZ Мұхтар Досжанов. Фото: KAZ.NUR.KZ](https://cdn.nur.kz/images/1120/272a737f20e7a0e5_w.jpeg)
"Соломенный" (сабан) кірпіштің өзі үгітіліп тұр. Арнайы тормен бір-біріне жалғап береміз дейді. Кепілдік қанша жылға беріледі десем, үш жыл екен. Сонда мен үш жылдан соң оларды қайдан табамын? Үйім жолдың бойында. Жүк көліктері ары-бері өткен сайын қимылдап тұр. Қазірдің өзінде қабырғалары үгітіліп жатыр. Шатырды да, басқасын да алып тастады. Тек қаңқасы қалды қазір",- деді ашынған қария.
![Мұхтар Досжановтың үйі. Фото: KAZ.NUR.KZ Мұхтар Досжановтың үйі. Фото: KAZ.NUR.KZ](https://cdn.nur.kz/images/1120/4f40d9a4e9a5b7ac_w.jpeg)
![Мұхтар Досжановтың үйі. Фото: KAZ.NUR.KZ Мұхтар Досжановтың үйі. Фото: KAZ.NUR.KZ](https://cdn.nur.kz/images/1120/95b56504347ace6e_w.jpeg)
Егер үйімді қайта салып бермесе, қыстың қақаған суығында балаларым, немерелеріммен далада қалатын түрім бар",- деп ашуға булықты ол.
![Мұхтар Досжановтың үйі. Фото: KAZ.NUR.KZ Мұхтар Досжановтың үйі. Фото: KAZ.NUR.KZ](https://cdn.nur.kz/images/1120/3ac17501e1718f3a_w.jpeg)
![Мұхтар Досжановтың үйі. Фото: KAZ.NUR.KZ Мұхтар Досжановтың үйі. Фото: KAZ.NUR.KZ](https://cdn.nur.kz/images/1120/303247b1c60e1189_w.jpeg)
Ал 70 жастағы Серік Өтешовтың үйі Нұр-Сұлтан қаласына берілген секторда орналасқан. Құрылысты жүргізуге келгендер оның үйін алғашында ағымдағы жөндеуден өткіземіз деген. Алайда үйдің төбесін ашқан қара жұмысшылар ондағы жағдайды көріп жұмысты жүргізуден бас тартыпты.
![Серік Өтешов. Фото: KAZ.NUR.KZ Серік Өтешов. Фото: KAZ.NUR.KZ](https://cdn.nur.kz/images/1120/c81b064d970f761e_w.jpeg)
"Олар "Ертең біздің басымыз дауға қалады. Ағымдағы жөндеуге жарамайды үйіңіз" деп кетіп қалды. Қайта имандары бар екен. Ал Нұр-Сұлтан секторының жауаптылары болса, тыңдағысы жоқ. Мен өзім талай жыл құрылыс саласында жұмыс еткенмін. Тіпті шыны керек, ертең шатырын ашса, үйім құлап қалуы да мүмкін",-деді ол.
![Серік Өтешовтің үйі. Фото: KAZ.NUR.KZ Серік Өтешовтің үйі. Фото: KAZ.NUR.KZ](https://cdn.nur.kz/images/1120/01d66443d5268963_w.jpeg)
Арыстық қос қарияның үйіне сейсмологиялық институттағылар сараптама жасап кетіпті. Енді олар сол соңғы қорытынды нәтижесін күтіп отыр.
![Серік Өтешовтің үйі. Фото: KAZ.NUR.KZ Серік Өтешовтің үйі. Фото: KAZ.NUR.KZ](https://cdn.nur.kz/images/1120/83a8d015550a3ddf_w.jpeg)
Арыс қаласы әкімінің орынбасары Ербол Ақтаев екі тұрғынның үйі сүрілмейді деп отыр. Себебі, соңғы сараптама қорытындысы солай шығыпты. Ал әзірге тұрғындарға бұл туралы айтылмаған.
![Серік Өтешовтің үйі. Фото: KAZ.NUR.KZ Серік Өтешовтің үйі. Фото: KAZ.NUR.KZ](https://cdn.nur.kz/images/1120/8473d7ebb1785fad_w.jpeg)
"Арыста 23 үй иесі алғашқы сараптама қорытындысымен келіспей, жөндеу жұмыстарын бастауға рұқсат бермеген болатын. Қазақ құрылыс пен сәулет ғылыми-зерттеу және жобалау институтының мамандарын шақыртқанбыз. Сіз айтып отырған екі үйге келсем, институт қорытындысымен сүрілуге жатпайтын болды. Бізге сондай қағаз берді. Ол екі үй де күрделі жөндеуден өткізіледі. Құрылысшылар дайын",-деді Арыс әкімінің орынбасары.
![Серік Өтешовтің үйі. Фото: KAZ.NUR.KZ Серік Өтешовтің үйі. Фото: KAZ.NUR.KZ](https://cdn.nur.kz/images/1120/311790323468b81c_w.jpeg)
Шенеуніктің сөзінше, күрделі жөндеу жұмыстары жүргізілген сәтте тұрғындар әкімдік тарапынан берілген уақытша баспанамен қамтамасыз етілмек.
Мақаланың түпнұсқасы: https://kaz.nur.kz/society/1820549-dalada-kalatyn-trim-bar-arysta-krylysy-li-bastalmagan-j-trgyndary-nazyn-bildirdi/