Армения ауруханаларында коронавирус жұқтырғандарға орын жетіспеуде

Арменияда коронавирус инфекциясын жұқтырған 200-ге жуық жергілікті тұрғынға шұғыл медициналық көмекке қажет деп хабарлайды KAZ.NUR.KZ порталы Хабар 24-ке сілтеме жасап.

Соңғы мәліметтерге сәйкес, Арменияда 13 мыңнан астам адамнан коронавирус анықталған. Бұл 3 миллионға жуық халқы бар мемлекет үшін үлкен көрсеткіш.

Елде 9 медициналық мекеме арнайы құралдармен жабдықталып, коронавирус жұқтырғандарды емдеумен айналысып жатыр. Бірақ ондағы 2 мың орынның өзі жеткіліксіз болып тұр.

Өзінен де коронавирус анықталған елдің премьер-министрі Никол Пашинянның айтуынша, Армения коронавирусқа қарсы күреске барлық күшін жұмылдырған.

"Бірақ соның өзінде қазір ауруханалар лық толып, жаңа науқастарды қабылдай алмай жатыр. Тіпті медициналық көмекті күтемін деп кейбіреулер көз жұмады. Бұған қоса, 2 науқас реанимация бөлімінде орын жетіспеуілігі салдарынан қайтыс болды", - дейді ол.

Жалпы, Арменияда коронавирустан көз жұмғандар саны 200-ге жуықтаған.

Сонымен қатар, елде білікті дәрігерлер тапшылығы да байқалып жатқаны анықталған. Осыған байланысты Денсаулық сақтау министрі Арсен Торосян басқа ауруханалардағы мамандарды короновирусқа қарсы күреске шақырды.

Сондай-ақ, бірқатар емханада дәл осы науқастарды қабылдауға қосымша орындар дайындалып жатыр.

"Өкінішке қарай, соңғы кезде коронавирус зардабы күшейді. Өйткені алдыңғы уақытта бізде жеңіл және орташа ауыр жағдайлар ғана тіркеліп жүрген. Ал қазір науқастардың басым бөлігі ауыр, тіпті аса ауыр халде", - дейді инфекциялық аурухана директоры Мгер Давидянц.

Коронавирустың өршуіне байланысты Армения билігі елді қайтадан карантинге жабу мәселесін қарастырған. Бірақ оның экономикаға кері әсерін ескере отырып, қатаң шараларды қолға алмаған көрінеді.

Еске сала кетсек, соңғы дерек бойынша, әлемде 7 миллион адамнан коронавирус инфекциясы анықталды.

Мақаланың түпнұсқасы: https://kaz.nur.kz/society/1859346-armenia-auruhanalarynda-koronavirus-zktyrgandarga-oryn-zetispeude/