Top.Mail.Ru

Сайт нұсқасы

ru kz

Зектілері

Қазақ баласы Apple компаниясында жұмыс істегісі келетін отандастарына кеңесін айтты

Опубликовано:

жас маман
Фото: Түркістан газеті

Стэнфорд университеттің магистрі Темірлан Сейдахметов Кремний алқабына қарасты Купертино қаласындағы Apple компаниясының бас штаб-кеңсесінде жұмыс істейді. Apple Books жобасына жауапты командада аналитикалық мәліметтерді талдау бойынша қызмет ететін ол қазіргі жұмысы туралы айтып берді деп жазады KAZ.NUR.KZ порталы Түркістан газетіне сілтеме жасап.

Темірлан Сейдахметов Тараз қаласының тумасы. Ол Назарбаев университетінің алғашқы түлектерінің бірі екенін жеткізді. Отандасымыз елордадағы жоғарғы оқу орнын тәмәмдаған соң Стэнфорд университеттің магистратурасына түскен.

Темірлан Қазақстанда көптеген жастар білім ордасын диплом үшін оқитынын жасырған жоқ.

"Бізде көп студенттер төрт жыл бойы оқығанын бұйым көрмей, көп жағдайда басқа мамандықтың жетегінде кетіп қалады. Оқыған білімінің пайдасын көр­мейді. Таныстарымның арасында "Әйтеуір оқуды бітірсем болды. Дипломды қайтсе де алу керек, әйтпесе ұят" деп жүргендер көп бол­ды, әйтсе де диплом алудың жұмысқа тұру­ға түк ықпалы жоқ секілді көрінеді", - дейді ол.
маман
Фото: Түркістан газеті

Тараз қаласының тумасы Стэнфорд уни­верситетінің магистрі атанған соң бірнеше қызметте бағын сынап көргенін, сөйтіп, жүргенде Apple және Google компанияларынан шақыру келгенін айтады.

"Бұның арасынан ұсынған позиция, бірге істейтін команда әрі істелініп жатқан жоба жағынан Apple компаниясын тиімді деп таптым. Бүгінде Apple-дің осындағы, яғни Кремний алқабына қарасты Купертино қаласындағы бас кеңсесінде жұмыс істеп жатқаныма екі жылдың жүзі болды", - дейді отандасымыз.

Темірлан әйгілі компанияда атқаратын қызметі жайлы да айтып берді.

"Мұнда аналитика жасауға жауапты команда қатарындамын. Apple-дің Iphone, Macbook, Іpad секілді құрылғыларына ор­натылатын түрлі қосымшаларымен жұмыс істеймін. Дәл қазіргі таңда Apple Books жо­басындамын. Біздің команда Apple Books жүйесінде оқырманды кітап оқуға қызық­тыру үшін дизайн, инженерия жағынан қолайлы жағдай жасауға жауапты. Жалпы, оқу процесін немесе аудио кітап тыңдауды жақсартуға атсалысу өте қызықты іс. Айналысып жүрген ісім адамзатқа пайдалы іс болған­дықтан, өзіме қатты ұнайды. Кітап оқыған­нан зиян көрген адамды кездестірген емес­пін", - дейді Назарбаев университеніні түлегі.

Ол Қазақстанда ІТ саласында алдына жан салмай дамып келе жат­қан мемлекеттердің қатарына кіруге ты­рысу керек екенін атап өтті.

Темірлан алдағы уақытта елімізге пайдасы тиер жоба жасағым келеді, дейді.

"Негізі, бастапқыда сыртта бірнеше жыл жұмыс істеп, елге ораламын деп ой­лағанмын. Десек те, елге келіп елең етерлік жаңалық ашу үшін тәжірибе жинау керек екенін ұқтым, оның үстіне дәл қазір бір үлкен жоба ашуға дайын емеспін. Оның үстіне, Қазақстанда ІТ жобаны өрістетудің проблемасы көп, әрі қиынға түсетіні анық. Оған қоса, он сегіз миллион халықтың ішінде қазақ тіліндегі қосымшаларды қолданатыны тіпті аз, сол себепті қазақ тіліндегі стартап жобаны әзірлеу тиімді болмай тұрғаны рас", - дейді ол.

Темірлан АҚШ-та жүріп Әсел атты болашақ жарымен танысқанын да атап өтті.

"Әйелімнің мамандығы – ди­зай­нер. Степногорск қаласының тумасы. Алды­мен сол қалада көркемөнер мектебінде оқып, кейіннен Сан-Францискодағы өнер ака­демиясында білім алған. Танысқаннан кейін екі жылдан соң, Таразда тойымызды өт­кізіп, осында қайта оралдық. Қазіргі таңда ар­хитектура бойынша әлемдегі ірі ком­па­ниялардың бірі саналатын Gensler компа­ниясында интерьер дизайнер болып жұмыс істейді", - дейді ол.

жас маман
Фото: Түркістан газеті

Сөз соңында Темірлан Apple ком­паниясында жұмыс істеп, тә­жірибе жинақтағысы келетін оқу­шы­ларға, студенттерге өз кеңесін берді.

"Apple компаниясына жұмысқа келерде де көп іздендім. Мәселен, Малкольм Гладуэлл "Генийлер және аутсайдерлер" кі­табында әлемдік деңгейдегі маман атану үшін 10 000 сағат жұмыс істеу керек, ал егер ор­таша деңгейдегі маман болғыңыз келсе, 2 000 сағат жұмыс істеу қажет екенін алға тар­тады. Сол секілді егер оқушы немесе сту­дент 2 000 сағат өз білімін арттыруға арнаса, алдағы уақытта кез келген ірі компанияға жұ­мысқа тұратын әлеует қалыптастырады. Осы­лайша, күніне өзінің осал тұсын жақ­сартып, ал мықты жағын одан сайын ұштай түссін деймін.

Тағы бір айта кетерлігі, мен бас­тапқыда, математика мен физика, сосын химиялық инженерияны оқыдым, ақырында ІТ саласына келдім. Алдыңғы екеуін жұ­мыс­та қолданбаймын, десек те техникалық база бар. Сол себепті бірінші мамандығыңды дұрыс игере алмай қалсаң, бұдан қорқатын еш­теңе жоқ. Тек дер кезінде өзіңе қажетті бағытты таңдай біліп, бар біліміңді мұнымен бай­ланыстырып, өз жолыңды тауып алсаң бол­ғаны, қалғаны өз ретімен болады. Бола­шағын жарқын еткісі келетін жас маман алдымен дүкен ашудан да ауқымды, үлкен жоспарлар құрса деймін", - деп сөзін қорытындылады Apple компаниясының маманы.

Еске сала кетсек, бұған дейін коронавирус Apple компаниясының табысына қалай әсер еткенін жазған едік.

Сонымен қатар белгілі композитор Марат Омаровты Дональд Трамптың өзі АҚШ-қа шақырғанын хабарлаған болатынбыз.

Мақаланың түпнұсқасы: https://kaz.nur.kz/society/1870544-kazak-balasy-apple-kompaniasynda-zmys-istegisi-keletin-otandastaryna-keesin-ajtty/