Оңтүстік Кореяда қайтыс болған отандасымыздың денесін туыстары елге жеткізе алмай отыр

Оңтүстік Кореяда бір апта бұрын жол апатынан ажал құшқан отандасымыздың денесін туыстары елге алдыра алмай жатыр. Марқұмның денесі кешіккен сайын туыстарының уайымы да ұлғайып барады деп хабарлайды КТК арнасы.

"Қазіргі бізге айтып отырған уақыты 17-ші қараша күнгі жүк тасымалдаушы ұшақ болып отыр. Қай қазақ қайтқан адамды 15 күн ұстайды айтыңызшы! Жан дегендегі жалғыз ағам. Анам болса 2-ші дәрежелі мүгедек", - дейдің марқұмның інісі.

22 жастағы Бейбарыс Арын былтыр қазан айынан бері Оңтүстік Кореяда жұмыс істеп жүрген екен. Бір апта бұрын ол мінген көлік апатқа ұшырап, отандасымыз сол жерде көз жұмған.

Содан бері туыстары оның денесін алдыру үшін ел-жұрттан жылу жинауға мәжбүр болған. Қажетті 2 миллион 600 мың теңге табылғанда, ұшақта орын болмай шыққан.

Тек, елшіліктің араласуымен денесі бүгін елге жеткізілуі мүмкін. Кейін өзі туып-өскен Арыс қаласына жерленбек. Оның артында мүгедек анасы, екі қарындасы мен інісі қалды.

Дереккөз КТК арнасы

Еске сала кетсек, бұған дейін 2 қарашада Польшаның Ополе-Любельске қаласында 2004 жылы туған Қазақстан азаматы оқ жарақаты салдарынан көз жұмғанын хабарлаған едік.

Кейін Қазақстанның Варшавадағы елшілігі отандасымыздың қазасына байланысты мәлімде жасады.

Сонымен қатар Түркияның Измир қаласында қазақстандық "Бурундайавиа" АҚ компаниясының ұшқышы кенеттен жүрегі тоқтап, қайтыс болғанын жазған болатынбыз.

Марқұм Измир қаласына орман өртін сөндіру үшін барған.

Мәтіннен қате тапсаңыз, бізге жазыңыз