Top.Mail.Ru

Сайт нұсқасы

ru kz

Зектілері

Әйгілі Amazon-да жұмыс істейтін қазақ қызы туралы не білеміз

Опубликовано:

Фото
Фото: Дара Түменбаеваның жеке мұрағаты

ІТ бағытына бет бұрған жас мамандар арасында Facebook, Amazon, Apple, Netflix және Google сынды әлемге әйгілі компанияларда жұмысқа ор­наласуды арман ететіндер көп. Сол жерде көрген-түйгендеріне сүйене отырып жеке жоба ашуға, болашақта адам тұрмысын жеңілдететін тың жаңалық әкелуге ұмтылады. Осындай мақсатты көздеп жүрген отандасымыз Дара Тү­менбаева Испания астанасы Мадридте орналасқан Amazon компаниясының кең­сесінде бағдарлама жасақтаушы болып жұмыс істейді деп хабарлайды Түркістан газеті.

Дара Amazon-ға жұ­мысқа кіру үшін сегіз ай уақыт кеткенін жасырмады. Сұх­баттасу процесінің өзі екі айға жал­ғасты, дейді ол.

"Алдымен телефон арқылы сұхбат­тасасың, кейін онда жұмыс істейтін ІТ маманы берген есепті шешуің керек, келесі кезеңде мінез-құлық психологияңды тексеретін сұрақтар қояды, сосын соңғы шешуші кезеңде бетпе-бет сұқбаттасуға шақырады. Сұқбаттасуға мені Оңтүстік-Шығыс Азия аймағынан тапсырған үміткерлермен бірге Жа­понияға шақырды. Онда бір күннің ішін­де төрт рет сұқбаттасып, нәтижесінде дәл сол жерде Amazon Kindle жобасының ко­ман­дасына қабылданғанымды жеткізді. Сосын Amazon-ның алты қалада орналасқан кең­селерінің ішінен біреуін таңдауымды сұра­ды, Еу­ропадағы нарыққа байланысты Мадрид қаласын таңдадым", - деді қазақ қызы.

Фото
Фото: Дара Түменбаеваның жеке мұрағаты

Отандасымыз Amazon Kindle-де қандай мін­деттерге жауапты екенін атап өтті.

"Мұнда бағдарлама жасақтаушымын, аны­ғырақ айтсам, Amazon Kindle-дің Android және ІОС операциялық жүйесіне ор­­натылуына жауаптымын. Kindle құры­л­ғысын сатып алғанда, алдымен телефон ар­қылы синхронизация жасауыңыз керек. Қажетті кітаптарыңызды жүктеп алып, тіпті интернетке қоспай-ақ, емін-еркін оқи ала­сыз. Сондай-ақ кітаптарды қайда сақ­таймын деп те бас қатырмайсыз. Жалпы, кітап­құмар адамға Kindle құрылғысы – тап­тырмас құрал", - деді Дара.

Фото
Фото: Дара Түменбаеваның жеке мұрағаты

Алматы қаласының тумасы бү­гінде өнімді еңбек етіп жатқан жеке командасы бар екенін алға тартты.

"Бұл стартап командам бес адамнан құралған. Мен сол командаға басшылық етемін. Жалпы, еншімде үш жаңа жоба бар.

Фото
Фото: Дара Түменбаеваның жеке мұрағаты
  • Біріншісі медицинамен байланысты, анам дәрігер болып жұмыс істейтін медициналық орталықта пайдалы жобаны жүзеге асыруға ба­рымызды салып жатырмыз. Сол жоба ар­қылы лор дәрігер өзінің емделушісі туралы түгел мәліметті қағаздардың арасын ақ­тарып жүргенше, компьютер арқылы таба ала­тын болады. Осы бастаманы масштабтау – менің басты армандарымның бірі. Сосын тағы бір арманым – емделушілерге арналған мобильді қосымша құрастыру. Мұнда емделуші туралы барлық мәлімет сақтаулы тұрады. Сосын емделуші медици­налық мекемеге келгенде камераға қарап, сканерлеу арқылы оған қатысты мәліметті бірден экранға шығаратын жоба ойластырудамын.
Фото
Фото: Дара Түменбаеваның жеке мұрағаты
  • Ал екінші жобам "50 кездесу" деп аталады. Атал­ған жобаның мақсаты – карьера қуа­лаймын деп жүріп, жеке өмірін ұмыт қал­дырған адамдарды табыстыру. Ағылшын тілін­де Power Couple деген жақсы сөйлем бар, қазақшаға аударсам мағынасын дұрыс жет­кізе алмайтын секілдімін. Бұл өз жұ­мысында жемісті еңбек етіп жүрген ер мен әйел­дің өзара тіл табысуы, қолдау көр­сетуі де­генді білдіреді. Аталмыш жобаны Орта­лық Азия аймағына танытып, сосын ары қарай әлем қолданатындай деңгейге жеткізгім келеді. 
Фото
Фото: Дара Түменбаеваның жеке мұрағаты

OK Dara school деген үшін­ші жо­бамда тыңдаушыларға қызықты әрі та­ным­ды, инновацияға қатысы бар дүниелерді үйретемін, өз білгеніммен бөлісемін. Мен секілді ІТ-ға қатты қызы­ғатын қыздарға бағыт-бағдар көрсетемін. Байқап тұрға­ныңыз­дай, мұнда мен коуч, ментор ретінде жұмыс істеймін", - деді ол.

Фото
Фото: Дара Түменбаеваның жеке мұрағаты

Дара Қазақстанмен байланысты жос­парлары екенін жасырмады.

"Армандаған Amazon-ға кіріп алдым екен деп, артымда қалған адамдарды еш ұмытып кетпеймін. Біле білсеңіз, елде ІТ-ды жаңғақша шағатын та­ланттар өте көп. Шынымды айтсам, мұндай бейімді балаларды басқа жерден көрген емеспін. Дегенмен, олардың көзге түсуге мүмкіндіктері жоқ, шама-шарқы жетіңкіремей жатады. Ал өз қабілетін дұрыс арнаға бағыттаудың жолын білмейтін олар жағымсыз әрекетке әуес болып алады. Бірі азартқа кіріп, ойын ойнайтын жерлерден шықпаса, енді бірі алкогольді ішімдікке құмар болып кетеді. Сол себепті олардың басқа жолға түсіп кетпеуіне жол бермей, қолынан келетін жұмысқа кіргізіп немесе менің стартап жобаларымнан орын тауып беруге тырысып жатырмын. Қазіргі таңда 18-25 жас аралығындағы жастармен жұмыс істегім келіп жүр. Дегенмен, елде сол талант­тарды жұмылдырып, тың нәрсе жасайын десең, көп жағдайда біздікілер идеямызды түсінбей жатады. Таныстарымның біразы инновациялық идеяларын ортаға салып, таныстырып еді, көпшілігі түсінбей, нәтижесінде демеуші де табылмай, ақы­рында мұхит асып, Америкадан демеуші тауып, сол жерде қабілетін дамытуға мәж­бүр болады. Ал мұны дер кезінде түсінбеген қалталы адамдар қолдау білдірмегеніне бармағын тістеп, өкініп қалады", - деп сөзін қорытындылады әйгілі компанияның қызметкері.

Еске сала кетсек, бұған дейін Африкада мұғалім болып жүрген қазақ қызы туралы жазған болатынбыз.

Сонымен қатар Стамбұлда жеке дүкенімен қоса, шағын зауыты бар Тұран Баһадүр есімді қандасымыз туралы хабарлаған едік.

Мақаланың түпнұсқасы: https://kaz.nur.kz/society/1884671-jgili-amazon-da-zmys-istejtin-kazak-kyzy-turaly-ne-bilemiz/

pixel