Қауыннан чипсы жасаған қазақ ғалымын білесіз бе (фото)

Қызылордалық кәсіпкер қауыннан чипсы жасап шығаруда. Ерекше бастаманы ауыл шаруашылық ғылымының кандидаты, Қорқыт ата атындағы Қызылорда университетінің ғалымы Самалбек Қосан қолға алған деп жазады Егемен Қазақстан.

Самалбек Қосан "қазақша чипсы" жасау туралы идея қалай келгенін айтып берді.

"Бір күні жатақ­ха­­нада жататын студент сабаққа келмей қалды. Себебін сұрастырсам, чипсы жеп уланып қалыпты. Содан есіктің алдында тұрып, ізденушілердің бәрінен таңғы асқа не жегенін сұрауға көштім. Сонда көзімнің жет­кені, студенттердің 80-90 пайызы са­бақ­қа нәр татпай келеді. Бірінші пар аяқталған соң буфетке жүгіріп чипсы, кириешки алады. Оның қалай дайындалғанына бас қа­тыр­­майды. Соңында уланып қалып жатады. Осы оқиғадан кейін балалар мен жас­тардың сол сүйікті асын немен алмас­ты­руға болатынын ойланып жүрдім", - дейді Самалбек Қосан.

Проблеманың шешімін іздеуде ғалым өзі­нің тәжірибесіне сүйенген. Ойындағысын жүзеге асырған соң, патент алуды қарастыра бастаған.

Бүгінде чипсы екі түрлі формада көпшілікке ұсынылып отыр. Айтуынша, қауын чипсыларын дайындау үшін Қызылорда облысында өсірілетін қанттылығы жоғары, кеш пісетін, қытырлақ қауындар пайдаланылады және оны дайындау үш ке­зеңнен тұрады.

"Алдымен піскен қауын мұқият тазаланып, кейін жұқа тілімдерге кесіледі. Үшінші кезеңінде дайын бөліктері 12 сағаттан аса уақыт кептіріледі. Бастысы өнім – экологиялық тұрғыдан таза", - дейді ол.

Самалбек Қосанның айтуынша, ерекше дәмнен ауыз тиген жандар бұл өнімнің тұрақты тұтынушысына айналады екен.

Айта кетейік, бұған дейін британиялық бойжеткен сырқатының салдарынан 10 жыл чипсы мен нан жеп келгенін және Англияда екі баланың анасы "чипсы" диетасынан көз жұмғанын жазған едік.