Қарағандыда Кеңес Одағының нышаны болған ескерткіштің жоғалуы дауға ұласты (видео)

Кеңес Одағының рәміздері төңірегінде Қарағанды ​​облысындағы кішкентай ауылда жанжал туындады. Ақбастау ауылының тауында үш метрлік орақ пен балғаның ескерткіші ондаған жылдар бойы тұрған. Тас мүсін жақында жоғалып кеткендіктен, Ақбастауда шұғыл жиын болып, оған аудандық және облыстық шенеуніктер қатысты деп хабарлайды КТК.

Кей ауыл тұрғындары Кеңес Одағының жоғалып кеткен рәміздерін орнына қайтаруды талап етуде. Азаматтардың айтуынша, ескерткіш мұнда 35 жылдан астам уақыт бойы тұрған және осы жылдар ішінде ауыл тұрғындары үшін КСРО-ның емес, Ақбастаудың символына айналған.

"Ақбастаудың жүрегі. Біз мұнда жастайымыздан тұрып келеміз. Бұл балға мен орақ - біздің рәміздеріміз. Біздің достар Ресейге, Германияға, Америкаға, Беларусьқа, Украинаға көшіп кетті. Барлығы қайтып келгенде, суретке түсу үшін алдымен осында барады. Біз ескерткіш маңында кездесеміз. Бұл бұзақылық!", - дейді ауыл тұрғыны Акбар Байқұнақов.

Алайда, тұрғынның пікірімен бәрі бірдей келісе қоймады. Өзге ауыл тұрғыны Аспандияр Сейсенов өткенге жалтақтамай, алға ұмтылу керек деп санайды.

"Әрине, балғамен орақты бұлай кесіп тастаудың қажеті жоқ еді. Бірақ менің ойымша, бұл туралы көп уайымдаудың қажеті жоқ", - дейді ол.

Тұрғындардың айтуынша, ескерткіш жоғалып кеткенге дейін аз уақыт бұрын кесіліп, құлатылған екен. Содан кейін ауыл тұрғындары жұмыла бәрін қалпына келтіріпті. Бірақ бұл жолы рәміздер металл қабылдау пунктіне өткізілген сияқты.

Телеарнаның хабарлауынша, ескерткіш жергілікті баланста болмағандықтан, оны іздестіре қоюы екіталай. Осы арада ауылдық округтің әкімі Рымбек Тұяқбаев жоғалып кеткен ескерткіштің орнына өзге ескерткіш қоюды ұсынып отыр.

"Егер учаске бөлініп, оған рұқсат берілсе, біз "Ақбастау жүрегімде", "Мен Ақбастауды жақсы көремін" тақырыбы аясында ескерткіш орнатамыз. Қазір барлық жерде "Мен Қарағандыды сүйемін" деген секілді сөздер бар емес пе", - деп түсіндірді әкім.

Ауыл тұрғындарының айтуынша, ескерткіштің жоғалуынан бөлек, ауылда өзге де мәселелер бар. Мәселен, жазда оларда мал жаюға жер жоқ, өйткені ауылдың аймағындағы барлық жер сатылып кеткен. Ауылдың кейбір жерлерінде сумен проблемалар бар.