RU

Нұр-Сұлтан тұрғындарына COVID-19-ға қарсы вакцина қашан салынады

Вакцина салдыру сәті
Көрнекі фото: Manuel Velasquez/Getty Images

Нұр-Сұлтан қаласының тұрғындарына коронавирусқа қарсы вакцина мамыр айында егіле бастайды. Бұл туралы қаланың бас санитар дәрігері Сархат Бейсенова онлайн брифнг барысында мәлімдеді деп хабарлайды KAZ.NUR.KZ.

Оның сөзінше, 1 ақпаннан бері Нұр-Сұлтан қаласында ресейлік "Спутник V" вакцинасының бірінші дозасы 2 008 медицина қызметкеріне егілді.

Олар: жедел жәрдем, алғашқы медициналық-санитарлық көмек, инфекциялық стационарлар, жансақтау бөлімдері, науқасты қабылдау бөлмесі, санитарлық-эпидемиологиялық қызмет, сараптама орталығы мен қаладағы стационарлардың жұмысшылары.

Екінші кезеңде вакцина педагогтер мен күш құрылымдарының қызметкерлеріне салынады. Одан кейін сәуір айында студенттерге егіледі.

"Вирусты жұқтыру қаупі жоғары санаттағы адамдар түгел қамтылғаннан кейін ғана қала тұрғындарына екпе егіледі. Яғни, болжаммен, мамыр айында біз қала халқына вакцина салуды бастаймыз", - деді Бейсенова.

Елімізде 1 ақпанда коронавирус инфекциясына қарсы қарсы жаппай вакциналау басталды. Екпе, алдымен, инфекцияны жұқтыру және тарату қаупі жоғары халықтың осал топтарына кезең-кезеңмен салынады. Олардың ішінде медицина қызметкерлері, педагогтар, құтқарушылар, полицейлер, әскерилер, созылмалы ауруы бар адамдар бар. Екпе тегін және ерікті түрде егіледі.

Айта кетейік, вакцинация екі кезеңнен тұрады: бірінші дозадан кейін 21 күн өткен соң, екіншісі егіледі. Бүгін, 22 ақпанда, республика бойынша "Спутник V" вакцинасының екінші дозасын егу басталды.

Денсаулық сақтау министрлігі жыл соңына дейін 6 миллионға жуық адамға вакцина салуды жоспарлап отыр.

Мақаланың түпнұсқасы: https://kaz.nur.kz/society/1900188-nur-sultan-turgyndaryna-covid-19-ga-qarsy-vakcina-qasan-salynady/