RU

Әсел Айтпаеваның өлімі: Грузияға барған қазақстандық тергеушілер жауап алуға кірісті

Фото
Фото: Instagram / assel_ayt

Грузияға барған қазақстандық тергеушілер Әсел Айтпаеваның өлімі бойынша адамдардан жауап алуды бастады деп хабарлайды Sputnik Қазақстан.

Мамандар алдымен Грузия азаматы Бесик Тордуадан жауап алады. Оған зорлау және өз-өзіне қол салуға дейін жеткізу әрекеттері бойынша айып тағылып отыр. Одан кейін Әсел Айтпаева жұмыс істеген фирманың иесінен жауап алынады. Ол – Қазақстан азаматы.

Тордуаның адвокаты Майя Устарашвилидің айтуынша, Бесик адам саудасына қатыспаған. 

"Ол кісінің өзі зардап шеккен. Грузияда компания ашып, жұмыс істеді. Әселмен және Мұратпен кездейсоқ танысты. Бесик істің мән-жайын грузиялық тергеушілерге айтып берген", - дейді Устарашвили.

Айта кетейік, адам саудасына қатысты мәселені Әселдің ата-анасы көтерді. Журналистерге сұхбат берген Алтай Айтпаев Бесик Тордуаның айтқан сөзіне сенбейтінін мәлімдеген. Ал "Әсел тұрмысқа шыққысы келген, өз-өзіне қол салуға бейім болды" дегенді естігенде есеңгіреп қалған. Грузияда жұмбақ жағдайда көз жұмған қазақ қызының туған-туыстары адам өлтіру бабы бойынша тергеу жүргізуді талап етіп отыр.

Әселдің анасы Айсұлу Айтпаеваның адвокаты Нино Андриашвилидің сөзіне қарағанда, қазіргі кезде грузиялық тергеушілер істі екі бап бойынша қозғады. Атап айтқанда, зорлау және өз-өзіне қол салуға дейін жеткізу.

"Айсұлу Тбилисиде болғанда біз прокуратурада 11 сағат отырдық. Қазіргі кезде зорлау және өз-өзіне қол салуға дейін жеткізу бойынша тергеу амалдары жүргізіліп жатыр. Біз адам өлтіру бабы бойынша іс қозғауды сұрап отырмыз. Қазіргі кезде сараптамалардың нәтижесін күтіп жүрміз. Сонда соққының іздері болды, болмады ма, көреміз" , - дейді Андриашвили.

Ал осы істің тағы бір фигуранты – Мұрат Мейірбеков Грузияда Әселді екі рет зорлағаны үшін айыпталып отыр. Қазіргі кезде ол Нұр-Сұлтан қаласының тергеу изоляторында отыр. 

Естеріңізге сала кетейік, 5 мамырда 26 жастағы қазақстандық Әсел Айтпаева Тбилисидегі үйлердің бірінің терезесі маңынан өлі күйінде табылған еді.

Кейінірек Грузияның 57 жастағы азаматы қамауға алынды. Елдің бас прокуратурасы оған қызды зорлап, өзін-өзі өлтіруге итермеледі деген айып таққан. Егер оның кінәсі дәлелденсе, онда ол алдағы 10 жылын колонияда өткізуі мүмкін.

Желіде марқұм мен күдіктінің арасындағы сөйлесудің жазбасы пайда болды. Жазбада ер адамның қызға қоқан-лоққы көрсетіп жатқанын естуге болады.

Дегенмен күдіктінің қорғаушысы бұл айыптаулармен келіспейтінін айтып, мәлімдеме жасады. Адвокат Лаша Шукакидзенің сөзінше, күдікті марқұммен жақсы қарым-қатынаста болған. Тіпті ол екеуінің үйленбек болғанын да айтқан.

Айта кетейік, қазақстандық полицейлер Грузияда қайтыс болған Әсел Айтбаеваның ата-анасының Бас прокуратураға жазған арызынан соң бойжеткенді шетелге жұмысқа шақырған туысы Мұрат Мейірбековті "Адам саудасы" бабымен қамауға алған болатын.

Мақаланың түпнұсқасы: https://kaz.nur.kz/society/1913689-asel-aitpaevanyn-olimi-gruziyaga-bargan-qazaqstandyq-tergeusiler-zauap-aluga-kiristi/