RU

"Таңғы сағат 5-те тұру керек": Өмірзақ Шөкеев абаттандыруға жауаптылар жұмысын сынға алды

Өмірзақ Шөкеев
Өмірзақ Шөкеев. Фото: Түркістан облысы әкімдігі

Түркістан облысының әкімі Өмірзақ Шөкеев қарамағындағыларға таңмен таласа оянып, қызу тіршілікке кірісуге кеңес берді. Ол мұны кеңседе жұмыс бастамас бұрын Түркістандағы абаттандыру іс-шараларының барысын тексеру қажеттілігімен түсіндірді. Бұл туралы облыс әкімдігінің Facebook-тегі ресми парақшасында хабарлады.

Жасыл желекке оранған шаһардың ауасы таза, экологиялық ахуалы тұрақты болатыны белгілі. Мұны жақсы білетін Түркістан облысының әкімі Өмірзақ Шөкеев бұл мәселенің маңызын естен шығармауға шақырып, көшеттерді күтіп-баптауға жауаптыларға шүйлікті. Түркістан қаласында барлығы 55 саябақ пен сквер бар.

Тамырынан нәр алмайтын қураған ағаштың көбеюіне алаңдаған облыс әкімі Өмірзақ Шөкеев апталық аппарат отырысында жауаптылар жұмысын қатаң сынға алды. Таңмен таласа оянып, қызу тіршілікке кірісуге кеңес берді.

"Таңғы сағат 5-те тұру керек. Жұмыс киімін киіп алып, барлық нысандарды аралап жүру керек. Аудандар әрқайсысы өзінің секторына жауап берсін. Көшетті отырғызғаннан бастап әр талдың түбін қопсыту, оны суару керек. Шөлдеп тұрған тал бірден көрінеді ғой. Каналдан суды бұрып, алып келу қажет болса, оны жасаңдар. Ешкім жоқ демейді. Резервуар керек па, насос керек пе, суды жеткізу керек. Каналдар не үшін керек, суарылмаса?", – деді облыс әкімі.

Еске салсақ, бұған дейін Түркістан облысының әкімі Өмірзақ Шөкеев "Керуен сарай" нысанын салуда қандай құрылыс материалдары қолданылғанын айтқан болатын. Өңір басшысы пенопласт арзан құрылыс материалы болғандықтан барлық жерде қолданылатындығын баса айтты.

Мақаланың түпнұсқасы: https://kaz.nur.kz/society/1919076-tangy-sagat-5-te-turu-kerek-omirzaq-sokeev-abattandyruga-zauaptylar-zumysyn-synga-aldy/