RU

Төтенше жағдайлар министрі Алматыда тоқ соққан жандарды құтқарған жігітті марапаттады

Марапаттау сәті
Фото: ҚР ТЖМ баспасөз қызметі

Төтенше жағдайлар министрі Юрий Ильиннің бұйрығымен Сәтбаев атындағы Қазақ ұлттық техникалық зерттеу университетінің 2-курс студенті Абылай Балапанов адамдарды құтқарудағы батылдығы үшін “Төтенше жағдайдағы ерлігі үшін” төсбелгісімен марапатталды.

Марапатты төтенше жағдайлар бірінші вице-министрі Ибрагим Күлшімбаев табыстады.

"Төтенше жағдайлар министрінің атынан Сізге белсенді азаматтық ұстанымыңыз үшін ризашылығымды білдіремін! Сіз-бүгінгі күннің батыры атағына лайықтысыз. Сын сағатта екінің бірі Сіз сияқты адам өмірін сақтаумен қатар, өз өмірін қауіпке тігіп, жедел шешім қабылдай алмайтын еді", – деді бірінші вице-министр.

Марапаттау сәті
Фото: ҚР ТЖМ баспасөз қызметі

Абылай Балапанов
Абылай Балапанов. Фото: ҚР ТЖМ баспасөз қызметі

Еске сала кетейік, 19 маусымда, Абылай су бұрқақтың қасындағы орындықта кітап оқып отырған болатын. Айқай-шу мен көмек сұраған дауыстарды естіген жас жігіт су бұрқақта тоқ ұрып жатқан адамдарды көрген. Өз өмірі мен денсаулығына қауіп төнгеніне қарамастан, Абылай еш ойланбастан адамдарды құтқаруға кіріскен.

Оның айтуынша, екі адамды құтқару кезінде өзін де электр тоғы қатты соққан. Студент өз-өзіне келіп есін жиғанша, сол маңда кездейсоқ болған 40-45 жастағы белгісіз ер адам тағы бір қызды құтқарып қалған.

Су бұрқақта орын алған оқыс жағдайда зардап шеккендерге реанимациялық шаралар жасау үшін (жүрекке жанама массаж және жасанды тыныс алу) оқиға орнында болған қаланың жанашыр тұрғындары да ат салысып, көмек берген.

Абылай Балапанов пен аты-жөні белгісіз ер адамның, сондай-ақ оқиға орнында болға қайырымды жандардың батыл әрекетінің арқасында үш адамның өмірі құтқарылды.

Ибрагим Күлшімбаев жас батырға отбасылық бақыт пен денсаулық тіледі.

Айта кеткен жөн, мемлекет басшысы Қасым-Жомарт Тоқаев Алматыдағы субұрқақтардың бірінде тоқ соғып, зардап шеккен әйел мен екі баланы құтқарған қазақстандық студентті Құрмет грамотасымен марапаттаған еді.

Мақаланың түпнұсқасы: https://kaz.nur.kz/society/1919316-totense-zagdailar-ministri-almatyda-toq-soqqan-zandardy-qutqargan-zigitti-marapattady/