СҚО-да ата-аналар балабақшаларда фото, видео түсіруге тыйым салынғанына наразылық танытты

Опубликовано:

бала
Көрнекі фото: pixabay.com

Петропавлда балабақшаға баратын балалардың ата-аналары мектепке дейінгі білім беру мекемесінде сурет пен видео түсіруге тыйым салынуына байланысты наразылық білдірді, деп хабарлайды Sputnik Қазақстан.

Басылымның мәліметінше, қалалық пабликтерде балабақшадағы таңертеңгілік мерекелік іс-шарада сурет және видео түсіруге тыйым салынуы қызу талқылануда.

"Петропавлда таңертеңгілік мерекелік іс-шара мен суретке түсіруге тыйым салып жатыр. Баланы киіндіру, оның өнерін тамашалау үшін балабақшаға кіргізбейтін болды, онымен барлық ата-ана келісті. Бірақ сурет түсіруге тыйым салуды шектен шыққандық деп санаймыз. ПТР-тесті мен вакцинасы бар бір фотографты басты қауіп деп танып отыр. Ал біз адам толы автобусқа күнде отырғанымыз, кезек күтетініміз қауіпті емес пе?", - деп жазды ата-ананың бірі әлеуметтік желіде.

Оның бұл пікіріне жүздеген адам қолдау көрсеткен.

Ата-аналардың наразылыған қатысты Солтүстік Қазақстан облысы санитарлық-эпидемиологиялық бақылау департаменті басшысының орынбасары Арман Күшбасов жауап берді.

Оның айтуынша, балалар арасында ауру таралмауы үшін осындай шара қабылданған.

"Халықтың эпидемиологиялық ахуалы саласындағы қолданыстағы нормативтік-құқықтық актілер балабақшада сурет және видео түсіруге тыйым салмайды. Бірақ коронавирустың таралуына, жіті респираторлық вирустық инфекцияның өршіп тұруына, тұмау жұқтырғандардың анықталуына байланысты жаппай ауру жұқтырудың алдын алу мақсатында балабақшаға бөгде адамдардың кіруіне тыйым салынды.

Эпидемиологиялық тұрғыдан балабақшада бөгде адамдардың болуы балаларға қауіпті. Коронавирус инфекциясынан бөлек ауа арқылы жұғатын тұмау сынды жіті респираторлық вирустық инфекциялар бар. Сондықтан бір ғана вирус сол топта, кейіннен бүкіл балабақшада жаппай инфекция жұқтыруға алып келуі мүмкін. Сондықтан фотографтар, аниматорлардың балабақшаға кіруіне рұқсат жоқ. Таңертеңгілік мерекелік іс-шаралар топтарды біріктірусіз, бір ғана топта сол топ қызметкерлерімен өткізіледі", - деп түсіндірді Күшбасов.

Ал қалалық білім бөлімі ата-аналар таңертеңгілік жиыннан түсірілген сурет пен видеоны алады деп сендірді.

"Жақында болатын жаңа жылдық таңертеңгілік іс-шараға қатысты ата-аналардың алаңдаушылығын ескеріп, мерекелік жиын балалар үшін қалыпты форматта өтеді деп мәлімдейміз. Мектепке дейінгі білім беру мекемелерінің педагогтары жаңажылдық тосынсый әзірлеп отыр, әкімшілік ата-аналар чаты арқылы фото және видео жолдануын қамтамасыз етеді", - дейді Петропавл білім бөлімінің қызметкерлері.

Білім бөлімі ата-аналарды енгізілген шектеу шараларына түсіністікпен қарауға шақырды.

Мақаланың түпнұсқасы: https://kaz.nur.kz/society/1947027-sqo-da-ata-analar-balabaqsalarda-foto-video-tusiruge-tyiym-salynganyna-narazylyq-tanytty/