Төтенше жағдайлар министрлігі тұрғындарға үндеу жасады

Бүгін, 21 желтоқсанда сағат 9.00-ден 12.00-ге дейін азаматтық қорғаудың құлақтандыру жүйесіне республикалық тексеру жүргізіледі. Бұл туралы Төтенше жағдайлар министрлігі ресми сайтында хабарлады.

"Құлақтандыру жүйесін тексеру барысында электр дабылдарын және сиреналық-сөйлеу құрылғыларын (дауыс зорайтқыштарды) қысқа мерзімге қосу, сондай-ақ теледидар және радиоарналардың эфирі арқылы хабарлау, интернет-ресурстары мен мобильді қосымшаларда ақпаратты орналастыру жоспарланған.

"Баршаның назарына!!!" дыбыстық сигнал - бұл қауіп төнген немесе төтенше жағдай туындаған кезде барлық шұғыл хабарламаларды таратудың алдында халықтың назарын аудару үшін берілетін ескерту сигналы", - делінген хабарламада.

Осы ретте, министрлік дыбыстық сигналды естіген кезде:

• теледидарлар мен радиоқабылдағыштарды қосу;
• апат туындаған жағдайда одан әрі әрекет ету туралы нұсқаулар алу үшін интернет-ресурстардағы және мобильді қосымшалардағы ақпараттарды оқып шығу керек екенін атап өтті.

Сонымен қатар, қауіпті өндірістік объектілер мен гидротехникалық құрылыстардағы жергілікті құлақтандыру жүйелерінің жарамдылығы тексеріледі.

Құлақтандыру жүйесіне республикалық тексеру жүргізудің мақсаты - құлақтандыру жабдығын әзірлікте ұстауға және халықты ықтимал төтенше жағдайлардан қорғауға бағытталған.