Алматыда балабақшада балаларды ұрған тәрбиеші жұмыстан қуылды

Алматыдағы жекеменшік балабақшалардың бірінде балаларға қол көтерген тәрбиеші қызметінен босатылды, деп хабарлайды Астана арнасы.

Телеарнаның мәліметінше, мектепке дейінгі білім беру мекемесінде қазір 95 бала тәрбиеленіп жатыр. Нысан осыдан 2 жыл бұрын ашылған көрінеді.

Балабақша меңгерушісі, болған жағдайға өзінің де таң қалғанын айтады.

"Өзі екінші категориялы педагог. Екі жыл жұмыс жасады. Ешқандай ата-анадан шағым болған емес, бұл бірінші рет тіркеліп тұрған жағдай. Бізде шұғыл түрде шара қолданып бұл кісіні еңбек кодексінің 52-бабы бойынша жұмыстан босатып отырмыз", - дейді балабақша меңгерушісі Анар Нұрсұлтанова.

Материал авторы: Ә. Лесбек

Еске сала кетейік, бұған дейін желіде балабақшада балаларды ұрған тәрбиешінің видеосы тараған болатын.

Аталған жайтқа қатысты Алматы қалалық Полиция департаменті пікір білдіріп, бұл фактіні Қылмыстық кодекстің 140-бабы 2-бөлігі бойынша тіркеуге алғандарын хабарлаған еді.

Құзырлы орган тергеу аясында оқиғаның мән-жайы анықталып, тәрбиешінің әрекетіне құқықтық баға берілетінін, соған сәйкес ол жауапкершілікке тартылатынын атап өтті.