Бас прокуратура: Үтікпен азаптау ісі бойынша 25 адам жәбірленуші болып танылды

ОКҚ өткен брифингте Бас прокуратура өкілі Алматы облысында қаңтар оқиғасынан кейін азаптау фактісі бойынша қозғалған істер туралы айтты. Өңірде құқық қорғау органдарының қызметкерлері 20-дан астам адамды үтікпен азаптады деген болжам бар. Басқа полицейлер адам өліміне әкеп соққан ұрып-соғу фактісі бойынша күдікке ілінген, деп хабарлайды KAZ.NUR.KZ тілшісі.

Бас Прокуратураның қылмыстық қудалау қызметінің бастығы Серік Шалабаевтың сөзінше, елде "тергеудің рұқсат етілмеген әдістері" туралы 8 даулы оқиға тергелуде.

Істер бойынша арнайы және құқық қорғау органдарының 15 қызметкері күдікті деп танылды – олардың 9-ы қамауда отыр.

Алматы облысында полицейлер адамдарды үтікпен азаптады деген күдікке ілінді.

"Алматы облысында қызған бу үтікті пайдалана отырып азаптау туралы іс бойынша 25 адам жәбірленуші болып танылды. Жедел-тергеу әрекеттерінің нәтижесінде арнайы прокурорлар 5 полиция қызметкерінің қатысы бар екені анықтады. Олардың үшеуі кінәсін мойындады", - деп хабарлады Бас прокуратурада.

Сондай-ақ Алматы облысындағы ҰҚК департаментінің тағы екі қызметкеріне қатысты тергеу аяқталды.

"Олар ұсталған адамды ұрып-соғып, оның өліміне себеп болды деп күдіктелуде", - деді Шалабаев.

Еске сала кетсек, бұған дейін Серік Шалабаев "Дикий Арман" лақап атымен танымал Арман Жұмагелдиевтің қаңтардағы тәртіпсіздіктер кезінде жасалған қылмыстарға белсенді түрде қатысқанын хабарлаған болатын.