"Алматы жастары" бағдарламасы бойынша қосымша іріктеу жарияланды

Алматы әкімдігі "Алматы жастары" жеңілдетілген несие беру бағдарламасына биыл негізгі байқау кезеңінде өтініш беріп, өтпей қалған қатысушылар арасында қосымша іріктеу жариялады. Бұл туралы қалалық әкімдіктің баспасөз қызметі Telegram-арнасында хабарлады.

Ведомствоның баспасөз қызметінің мәліметінше, бұл жолы бағдарламаға 2022 жылғы 18 мамырдан 1 маусымға дейін өтініш берген, бірақ құжаттың дұрыс толтырылмауына/рәсімделмеуіне/берілмеуіне байланысты өтпеген өтініш берушілер ғана қатыса алады.

Әкімдік биыл "Алматы жастары" бағдарламасы бойынша 1000 адамға қарыз беру қарастырылғанын, бүгінге дейін оның 863-і төлем қабілеттілігі бойынша мақұлданғанын атап өтті.

"Енді қалған 137 орынға бұрын құжат тапсырған 5225 қатысушы үміткер бола алады", - дейді қалалық әкімдік өкілдері.

Іріктеуге қатысу 2022 жылғы 10-14 қазан аралығында жүргізіледі. Ол үшін үміткер almaty-zhastary.kz сайты арқылы өтініміне өзгеріс енгізіп, құжаттарды тізімге сәйкес жаңарту қажет.