Таразда "Жасыл желек – жердің көркі" экологиялық жобасы аясында тал егілді

Тараз қаласын абаттандыру және көгалдандыру жұмысы - үнемі күн тәртібіндегі мәселе. Бүгін "Біз біргеміз" монументі маңындағы саябаққа "Жасыл желек – жердің көркі" экологиялық жобасы аясында тал отырғызу шарасы ұйымдастырылды.

Шаһардың 14 мөлтек ауданының айналасын көгалдандыру, абаттандыру жоспары бойынша 600 түп ағаш егілді. Оның ішінде көп жылдық қайың, акация, сән ағашы, шаған және шынар, шырша талдары бар.

Бұл талдардың барлығы - Тараздың климатына бейім ағаштар.

Экологиялық іс-шараға Тараз қалалық әкімдіктің бөлім басшылары мен қызметкерлері және ​ "Жасыл ел Тараз" жауапкершілігі шектеулі серіктестігінің қызметкерлері де атсалысты.

Сонымен қатар ағаш егу жұмыстарына арналған техникалар да тиісті жұмыстар атқарды.

Айта кетерлігі, ағаш отырғызу алдында көшеттерді суару мәселесі де шешілген. Бұл аумақта екі су құдығы мен сорғылар орнатылды. Тамшылатып суару жүйесі ішінара жүргізілді.

Алдағы уақытта да осы аймаққа жоба аясында жеміс ағаштарын отырғызу жоспарланып отыр.

Қаланы көріктендіру, көгеріштендіру жұмыстары өз жалғасын табады.