Қазақстанның бірқатар өңірінде ауа райына байланысты дауылдық ескерту жарияланды

Қазақстанның бірнеше облысында ауа райына байланысты дауылдық ескерту жарияланды, деп хабарлайды "Қазгидромет" мемметеоқызметінің ресми сайты.

Синоптиктердің болжамынша, 4 желтоқсанға қараған түні Маңғыстау облысының солтүстік-шығысында 15-20 градусқа дейін қатты аяз күтіледі. Облыстың солтүстік-батысында 15-20 м/с жылдамдықпен қатты жел соғуы ықтимал.

Жексенбі күні Шығыс Қазақстан облысының батысында, солтүстігінде қарлы боран күтіледі. Күндіз облыс орталығында жел 15-20 м/с дейін күшеюі мүмкін. Мамандар осы күні Абай өңірінің батысы мен солтүстігінде, орталығында да қарлы боран болады деп болжап отыр. Ал облыс орталығындағы желдің жылдамдығы 15-20 м/с жетуі мүмкін.

4 желтоқсан таңертең Батыс Қазақстан облысының солтүстігінде тұман күтіледі.

Синоптиктер бүгін Жетісу облысының Жалаңашкөл ауданында жел жылдамдығы 15-20 м/с дейін күшейеді деп есептейді. Оның екпіні 25 м/с дейін жетуі ықтимал.

Жексенбі Түркістан облысының оңтүстігінде, таулы және тау бөктеріндегі аудандарда тұман күтіледі. Күндіз тау асуларында жел жылдамдығы 15-20 м/с жетеді.

Бүгін таңертең Шымкентке де тұман түсуі мүмкін.

Мәтіннен қате тапсаңыз, бізге жазыңыз