Қостанай облысында мұғалімдер жазған ашық хаттан кейін мектеп директоры қызметінен кетті

Әлеуметтік желіде Қостанай облысы Мичурин ауылындағы мектеп мұғалімдерінің атынан жазылған ашық хат пайда болды. Содан кейін мектеп директоры қызметінен кетті. Бұл ақпаратты Қостанай облысының білім басқармасы растады, деп хабарлайды KAZ.NUR.KZ "Костанайские новости" басылымына сілтеме жасап.

Ашық хатта ұстаздар мектеп директорының мұғалімдердің телефондарын үнемі тексеріп отыратынын және ақша жинайтынын айтып, шағымданған.

"Директор Даданова балаларды балағаттауға жиі жол береді. Мәселен, ол баланы дарынсыз деп айтып, баланың ар-намысына тиіп, оны қорлайтын сөздер айтады", - дейді олар ашық хатта.

Ал ұжымның бір бөлігі директор Айнаш Даданованы қорғап, бірнеше мұғалімнің әлеуметтік желіде таратқан ашық хатында айтылған жайттарды жала деп атады.

Бұл ретте басылымға Қостанай облысының білім басқармасы қазір жұмыс тобының барлық мән-жайды зерттеп жатқанын, Мичурин атындағы мектеп директорының қызметінен кеткенін хабарлаған. Ведомстводағылар мұны директордың денсаулығының нашарлауы себеп болғанымен түсіндірген.

Мәтіннен қате тапсаңыз, бізге жазыңыз