Бүгін еліміздің мегаполистерінің бірінде 22 градусқа дейін аяз болуы мүмкін

Бүгін, 24 қаңтарда еліміздің үш ірі қаласы - Алматы, Астана және Шымкентте күн райы жауын-шашынсыз болады деп күтілуде. Бұл туралы "Қазгидромет" РМК ресми сайтында хабарлады.

Синоптиктердің болжамына сәйкес, бүгін күндіз Алматыда -3...-5 градус, түнде -12...-14 градус суық болуы мүмкін. Оңтүстік астанада жауын-шашын болмайды, дегенмен желдің жылдамдығы 0-5 метрге дейін жетеді деп күтіледі.

Астана қаласында сынап бағаналары күндіз -8...-10 градус аязды көрсетсе, түнде -20...-22 градусқа дейін суық болуы ықтимал. Елордада күн ашық болғанымен, жел 3-8 м/с күшеюі мүмкін.

Ал Шымкентте бүгін күн ала бұлтты болады деп болжануда. Күндіз -1...-3 градус болса, түнде сынап бағанасы -11...-13 градусқа дейін түседі. Қалада жауын-шашын жаумайды, десе де желдің жылдамдығы 3-8 м/с дейін жетеді деп күтілуде.

Еске сала кетсек, бұған дейін алдағы үш күнде ел аумағында ауа райы қандай болатынын жазған едік.