ҰҚК Қазақстанға заңсыз өтпек болған пәкістандықтардың ұсталғанын хабарлады

Ұлттық қауіпсіздік комитетінің Шекара қызметі 15 ақпанда Қазақстан-Қырғызстан мемлекеттік шекарасы арқылы Қазақстанға заңсыз өтпек болған 9 пәкістандықты ұстады. Бұл туралы ведомствоның ресми сайтында хабарланды.

Пәкістандықтарды ҰҚК Шекара қызметі Жамбыл облысы бойынша департаментінің әскери қызметшілері ҰҚКД және Меркі ауданы полиция бөлімінің қызметкерлерімен бірлесіп ұстаған.

Қазіргі уақытта құзырлы орган Пәкістан азаматтарына қатысты сотқа дейінгі тергеу бастады.

Еске сала кетсек, бұған дейін 4 ақпанда Ақтөбе облысында ҰҚК Шекара қызметі мемлекеттік шекараны заңсыз кесіп өтті деген күдікпен төрт шетел азаматын ұстаған еді.

Ұсталған адамдар қаңтар айында Өзбекстаннан заңды негізде Қазақстанға келіп, әрі қарай жұмыс істеу мақсатымен Ресей Федерациясына өтуді жоспарлаған. 

Алайда Ресейге кіруге шектеулері болғандықтан, олар түнгі уақытта жасырынуға арналған костюмдерді киіп, өткізу бекеттерінен тыс жерден шекараны кесіп өтуге әрекеттенген.