"20 градусқа дейін аяз, жауын-шашын": алдағы демалыс күндері Қазақстанда ауа райы қандай болады

Синоптиктер алдағы демалыс күндері Қазақстанда ауа райы қандай болатынын болжады, деп хабарлайды KAZ.NUR.KZ "Қазгидромет" РМК-ның ресми сайтына сілтеме жасап.

Метеорологтардың мәліметінше, 18-20 наурыз аралығында республиканың басым бөлігінде жауын-шашын (жаңбыр, қар түрінде), солтүстікте, шығыста қар, бұрқасын, көктайғақ, оңтүстікте жаңбыр, найзағай, сондай-ақ Қазақстан бойынша тұман және желдің күшеюі күтіледі.

Сондай-ақ 19 наурызда Алматы облысының, Жетісу облысының таулы аудандарында қатты жауын-шашын (жаңбыр, қар түрінде) күтіледі.

Синоптиктердің болжамынша, жауын-шашынсыз ауа райы еліміздің батысында ғана сақталады.

"Температуралық фонға келетін болсақ, айтарлықтай өзгерістер күтілмейді. Тек Қазақстанның солтүстік-батысында, солтүстігінде, орталығында, шығысында түнде 7-20 градусқа дейін, күндіз 0-8 градусқа дейін аяз болуы ықтимал", - дейді "Қазгидромет" өкілдері.

Мәтіннен қате тапсаңыз, бізге жазыңыз