Алматы мен бірнеше облыста автокөлік газы қымбаттауы мүмкін

Алматы қаласы мен тағы төрт облыста автокөлік газының бағасы өсуі мүмкін. Тиісті бұйрық жобасы "Ашық НҚА" порталында жарияланды.

Бұйрықта Алматы қаласы мен Алматы, Абай, Шығыс Қазақстан және Солтүстік Қазақстан облыстарында сұйытылған мұнай газының шекті бағасын арттыру туралы жазылған.

Атап айтсақ, тізімде көрсетілген өңірлерде сұйытылған газ бағасы өсуі мүмкін:

• Алматыда 65 теңгеден 75 теңгеге дейін;
• Алматы облысында 70-75 теңгеден 75-80 теңгеге дейін;
• Абай облысында 60-65 теңгеден 65-70 теңгеге дейін;
• Шығыс Қазақстан облысында 60-65 теңгеден 70-75 теңгеге дейін;
• Солтүстік Қазақстан облысында 70-75 теңгеден 75-80 теңгеге дейін.

Құжат 17 сәуірге дейін қоғамдық талқылауда болады.

"Қазақстандық отын қауымдастығының және нарық субъектілерінің көлік қызметтеріне (көлік-экспедиторлық қызметтер, вагондарды беру және жинау жөніндегі қызметтер) шығындардың ұлғаюына, СМГ-ны бірқатар облыстарда өткізу кезінде шекті бағаларды көтеру қажеттілігі туралы (5-тен 10 теңге шегінде) өтініштерін ескере отырып, көлік қызметтеріне (көлік-экспедиторлық қызметтер, вагондарды беру және жинау жөніндегі қызметтер) автомобильге газ құю станциялары мен газ жинақтау пункттерін, жалақы қорын, бөгде ұйымдардың қызметтерін ұстау және оларға қызмет көрсету, ҚТЖ-Жүк тасымалы" магистральдық темір жолдары бойынша жүктерді тасымалдауға арналған тарифтер СМГ-дағы белгіленген бағаларды бұрынғы деңгейде сақтай отырып, СМГ-ны өткізуді шектеу және оның тапшылығы тәуекелдері туындайды", - делінген ведомствоның түсіндірме хабарламасында.