Атыраулық оқушы әлемнің ең үздік 5 университетінен шақырту алды

Атыраулық 12-сынып оқушысы әлемнің ең үздік 5 университетінен шақырту алды. Бұл туралы Атырау қаласындағы Назарбаев зияткерлік мектебінің баспасөз хатшысы мәлімдеді, деп жазады Ақ жайық басылымы.

Басылымның хабарлауынша, Атыраудағы NIS-тің 12-сынып оқушысы Асқар Әлмұхамедов әлемнің ең үздік 50 университеті қатарына кіретін бес жоғары оқу орнынан шақырту алған.

Атап айтқанда, олар – Columbia University, Америкадағы University of California Berkeley және Georgia Institute of Technology, Кореядағы Korean Advanced Institute Science and Technology, Канададағы University of Toronto университеттері.

"Мен осыдан алты жыл бұрын NIS-ті таңдағаныма өте қуаныштымын. Өзіме осы жылдар бойы қолдау білдіріп, білім берген барша ұстазға, кураторыма, жалпы мектеп ұжымына үлкен алғысымды білдіремін", – дейді Асқар.

Дегенмен, Асқар қай оқу орнын таңдайтыны жайлы әлі нақты шешім қабылдамаған. Өйткені әлі де шақыртулар келіп жатқан көрінеді. Бірақ өзінің Columbia University-де білімін жалғастырмақ ойы бар.

Сондай-ақ Асқар бұған дейін халықаралық Apple компаниясының WWDC20 Swift Student Challenge атты байқауында жеңімпаз атанып, еліміздің IT компанияларында қызмет етіп те үлгерген.