Тоқаев Отан қорғаушы және Жеңіс күніне арналған бірқатар іс-шараға қатысады

Мемлекет басшысы Қасым-Жомарт Тоқаев Отан қорғаушы күні мен Жеңіс күніне арналған бірқатар іс-шараға қатысады, деп хабарлады президенттің баспасөз қызметі Telegram-дағы ресми арнасында.

"Президент – Қарулы Күштердің Жоғарғы Бас қолбасшысы 5 мамырда Бүкілармиялық кеңес өткізеді, ал 9 мамырда Астанада Ұлы Отан соғысында қаза тапқан боздақтардың рухына тағзым етеді деп жоспарланып отыр", - делінген ресми хабарламада.

Айта кетейік, бұған дейін Қорғаныс министрлігі биыл елімізде 7 мамыр - Отан қорғаушы және 9 мамыр - Жеңіс күні орай әскери шеру өтпейтінін хабарлаған еді.

Ведомствоның мәліметінше, бұл бюджет қаражатын үнемдеу мақсатында және басқа да міндеттерді шешу қажеттігіне байланысты.

"Жалпы алғанда қазіргі уақыттағы маңызды басымдық - Қазақстан Қарулы күштері бөлімшелерінің жауынгерлік әзірлігі мен ұтқырлығын талап етілетін деңгейде ұстап тұру", - дейді министрлік өкілдері.