Қазақстанда қанша халық, қандай ұлт өкілдері тұрады

Қазақстанда қанша ұлт өкілдері тұратыны туралы Қазақстан халқының бірлігі күні қарсаңында СЖРА Ұлттық статистика бюросының Telegram-дағы ресми арнасы хабарлады.

"Бүгінгі таңда Қазақстан халқының саны 19 808 430 адамды құрайды.

Оның ішінде 70,6 пайызы – қазақтар, орыс халқының үлесі – 15,1 пайыз, өзбектер – 3,2 пайыз, украиндар – 1,9 пайыз, ұйғырлар – 1,5 пайыз, немістер – 1,1 пайыз, татарлар – 1,1 пайыз, әзербайжандар – 0,7 пайыз, кәрістер – 0,6 пайыз және басқа ұлттар", – делінген хабарламада.

Ведомствоның мәліметінше, қазақтардың ең көп саны Түркістан облысында шоғырланған, яғни 1,5 млн, ал орыстардың жалпы санынан көпшілігі Алматы қаласында тұрады – 428 мың адам, өзбектер Түркістан облысында – 378 мың адам,ды құрайды, украиндар Қостанай облысында – 86 мың, 297 мың ұйғырдың басым бөлігі Алматы облысында қоныстанған, яғни 120 мың адам.

Сондай-ақ Ұлттық статистика бюросы елімізде гагауздар, лезгиндер, құмықтар, аварлар сияқты этностардың да өкілдері тұратынын хабарлаған. Қазақстанда бір шаңырақ астында барлығы 124 ұлт өкілі тұрады.

Еске салайық, ертең, 1 мамыр күні елімізде Қазақстан халқының бірлігі күні атап өтіледі, соған байланысты қазақстандықтар бір күн демалады.