Top.Mail.Ru

Сайт нұсқасы

ru kz

Зектілері

Қаскелеңде қаланың қақ ортасымен 200-ге жуық жылқыны айдап өткендер жауапқа тартылды (видео)

Опубликовано:

Қаскелеңде көше бойымен айдалған жылқылар
Қаскелеңде көше бойымен жүріп өткен жылқылар. Видеодан кадр: instagram.com/kaskelenkz

Әлеуметтік желіде Алматы облысы Қаскелең қаласында көше бойымен 200-ге жуық жылқыны айдап өткендер анықталып, жауапкершілікке тартылды. Бұл туралы KAZ.NUR.KZ Алматы облысы полиция департаментінің Instagram-дағы парақшасына сілтеме жасап хабарлайды.

Желіде Алматы облысы Қаскелең қаласында көше бойымен шауып бара жатқан үйір-үйір жылқының видеосы тарады.

Видео авторы кадр сыртында таңғалысын жасырмайды.

"Қаскелеңнің басты көшелерінің бірі. Бұлардың бәрі кімдікі? Қандай әдемі, құлындарымен бірге шауып бара жатыр", - дейді автор.

Бұл жайтқа қатысты Алматы облысы полиция департаменті пікір білдірді.

Облыстық полиция департаментінің хабарлауынша, 30 мамырда әлеуметтік желіге мониторинг жүргізу барысында Қаскелең қаласының көшелерінің бірінде 200-ге жуық жылқы жүріп өткені туралы видео анықталған.

"Қарасай ауданы аумағында Жамбыл ауылы жағынан Алматы-Екатеринбург бағытындағы автокөлік жолымен оңтүстікке қарай 200-ге жуық жылқы айдалған. Жылқылар Қаскелең қаласындағы Асқаров көшесінен оңтүстік бағытқа мал жайылатын жерге бара жатқан", - дейді облыстық полиция департаменті өкілдері.

Аталған дерек бойынша әкімшілік іс аудандық полицияда тіркелген.

"Іздестіру жұмыстары барысында Қарасай ауданы полиция басқармасы ЖПҚБ қызметкерлері Әкімшілік құқықбұзушылық туралы кодекстің 408-бабы 1-бөлігі (ауыл шаруашылығы жануарларын жаю қағидаларын бұзу), сондай-ақ Әкімшілік құқықбұзушылық туралы кодекстің 505-бабы 1-бөлігі (аумақтарды абаттандыру қағидаларын бұзу) бойынша үш азаматты анықтап, әкімшілік жауапкершілікке тартты", - дейді полиция өкілдері.

Сондай-ақ полиция құқық бұзушылармен бұдан былай мұндай фактілерге жол бермеу бойынша түсіндірме жұмыстары жүргізілгенін атап өтті.

Мақаланың түпнұсқасы: https://kaz.nur.kz/society/2022845-qaskelende-qalanyn-qaq-ortasymen-200-ge-zuyq-zylqyny-aidap-otkender-zauapqa-tartyldy-video/