"Дикий Арманды" қамауда ұстау мерзімі тағы ұзартылды

"Дикий Арман" деген лақап атпен танымал Арман Жұмагелдиевті қамауда ұстау мерзімі бүгін тағы ұзартылды. Ол 7 тамызға дейін қамауда болады. Бұл туралы Алматы қалалық соты мәлімдеді, деп хабарлайды KAZ.NUR.KZ.

"Алматы мамандандырылған ауданаралық тергеу сотының 2023 жылғы 5 маусымдағы қаулысымен сотқа дейінгі тергеп-тексеру органының қылмыстық іс материалдарымен танысу кезеңінде Жұмагелдиевті 2 ай мерзімге, яғни 2023 жылдың 7 тамызына дейін қамауда ұстау мерзімін ұзарту туралы өтінішхаты қанағаттандырылды", – деп хабарлады соттың баспасөз қызметінен.

Еске салайық, Дикий Арманның ұсталғаны былтыр 7 қаңтарда белгілі болған еді. Ал 11 қаңтарда ол қамауға алынды. Ішкі істер министрлігінің мәліметінше, онымен бірге қылмыстық топ болуы мүмкін деп күдіктелген бес адам ұсталған.

Сонымен қатар Бас прокурор Берік Асылов қаңтар оқиғасы бойынша біржылдық мәліметтерге сүйене отырып, Арман Жұмагелдиевті ҰҚК кураторының тапсырмасымен әрекет еткенін айтқан болатын.