"Күйеу жігіт қолдап келді": Көкшетауда тест тапсыруға той көйлегімен келген қалыңдық таңғалдырды (фото)

Көкшетау қаласында қалыңдық үйлену тойы күні магистратураға түсу үшін кешенді тест тапсырды. Бұл туралы Ұлттық тестілеу орталығының директоры Руслан Емелбаев Instagram-дағы ресми парақшасында жариялады.

Ұлттық тестілеу орталығының директорының сөзінше, талапкердің кешенді тестілеуді тапсыру күні некеге тұру күнімен тұспа-тұс келген.

"Көкшетау қаласында магистратураға түсу үшін кешенді тестілеуге ерекше талапкер келді. Маңызды емтиханды жіберіп алмауға шешім қабылдаған бақытты қалыңдықты тестілеуге күйеу жігіт қолдап келді", - деп жазды Руслан Емелбаев.

Ұлттық тестілеу орталығының директоры жазбасында жас жұбайларға махаббат пен ауызбіршілік, ал қалыңдыққа сәттілік тілеген.

Ұлттық тестілеу орталығы ресми сайтының мәліметінше биыл магистратураға түсуге арналған кешенді тестілеуге республика бойынша 42 569 өтініш келіп түскен.