Павлодар облысының әкімі аяусыз соққыға жығылған жасөспірімге қатысты жағдайды бақылауына алды

Кеше Павлодарда 13 жастағы мектеп оқушысы көшеде соққыға жығылды. Бұл оқиғаға қатысты өңір басшысы Асайын Байханов Instagram-дағы ресми парақшасында пікір білдірді.

"Бүгін мен аппараттық жиналыстың жабық бөлігінде Павлодар қаласында оқушыны жабылып ұрып-соғу оқиғасы бойынша сұрақты қозғадым.

Ата-ана ретінде мен бұған бей-жай қарай алмадым, сондықтан, полиция департаменті мен облыстың білім басқармасының басшылығына орын алған жағдайды тергеу барысымен мені хабардар етіп отыруды тапсырдым.

Жиналыстан кейін күдіктілер мен зардап шеккен балалар оқитын мектептердің біріне барып, педагогтармен сөйлестім, мемлекеттік органдарға зардап шеккен баланың отбасына жан-жақты көмек көрсетуді тапсырдым", - дейді Асайын Байханов жазбасында.

Павлодар облысының әкімі сондай-ақ кездесуден кейін күдіктілер мен олардың құрбандары оқитын мектептердің біріне тікелей барып, мұғалімдермен сөйлескенін, мемлекеттік органдарға зардап шеккен баланың отбасына жан-жақты көмек көрсетуді тапсырғанын айтты.

"Мұндай фактілер біздің қоғамда үйреншікті жағдайға айналмауы керек. Ондай жағдайларды түбімен жою, балаларды мейірімділікке, адалдыққа және әділеттілікке тәрбиелеу – біздің басты міндетіміз", - деді Асайын Байханов.

Еске сала кетейік, кеше Павлодарда көшеде аяусыз соққыға жығылған оқушының ауыр жарақатпен ауруханаға түскені белгілі болған. Полиция қылмыстық іс қозғады.