"Найзағай, 38 градус ыстық, қатты жел": бүгін еліміздің ірі қалаларында ауа райы қандай болады

Синоптиктер жұма, 4 тамызда Астанада тағы да найзағай ойнап, Алматы мен Шымкентте жауын-шашынсыз ауа райы сақталады деп болжады. Бұл туралы "Қазгидромет" РМК ресми сайтында хабарлады.

Метеорологтардың мәліметінше, бүгін Астанада найзағай ойнап, жаңбыр жауады. Жел жылдамдығы секундына 7-12 метрге жетіп, жел екпіні 15 м/с күшейетін болғандықтан дауылдық ескерту жарияланды. Елордада күндіз ауа температурасы +28...+30 градусқа дейін көтерілсе, түнде +16...+18 градусқа дейін төмендейді деп күтілуде.

Сонымен қатар Астанада өрт шығу қаупінің жоғары болуына байланысты дауылдық ескерту жарияланды.

Алматыда бүгін жауын-шашынсыз ауа райы күтіледі. Оңтүстік астанада күн ыстық, күндіз термометр +35...+37 градусты көрсетсе, түнде ауа температурасы +23...+25 градусқа дейін төмендейді. Жел жылдамдығы 3-8 м/с дейін жетеді.

Шымкентте де күн ашық, ауа райы жауын-шашынсыз болады. Күндіз термометр +36...+38 градусты көрсетсе, түнде мегаполисте ауа температурасы +20...+22 градусқа дейін төмендейді. Желдің жылдамдығы 8-13 м/с-ке дейін жетуі ықтимал.