Елімізде қала сыртындағы жолдарда жылдамдықты асырған көліктерді тіркейтін Zerek-2 жүйесі іске қосылады

Елімізде қала сыртындағы жолдарда жылдамдықты асырған автокөліктерді тіркейтін аппараттық жүйе жұмыс істейтін болады. Бұл туралы Polisia.kz ақпараттық медиа-порталы хабарлады.

Ведомство мәліметінше, ІІМ қала сыртындағы жолдарда белгіленген жылдамдық режимін асырған автокөліктерді тіркейтін аппараттық жүйені Автомобиль жолдары комитетімен және "ҚазАвтоЖол" ҰК" АҚ-мен бірлесіп іске қосып отыр.

Бұл жүйені іске қосудағы мақсат — жол жүру қауіпсіздігін қамтамасыз ету және жол-көлік оқиғаларының алдын алу бойынша бақылауды күшейту.

"33 ZEREK-2 бағдарламалық-аппараттық кешені әкімшілік өндірістердің бірыңғай тізілімі жүйесімен интеграцияланған, яғни, нұсқамаларды құқық бұзушыларға жіберу автоматты режимде жүзеге асырылатын болады", - дейді ІІМ әкімшілік полиция комитетінің ерекше тапсырмалар жөніндегі аға инспекторы Ақтоты Боранова.

Оның сөзінше, бүгінде ZEREK-2 мынадай автожолдарда жұмыс істеуге дайын:

• Шымкент – Қызылорда;
• Шымкент – Өзбекстан шекарасы;
• Шымкент – Тараз;
• Тараз – Қайнар;
• Қонаев – Талдықорған;
• Астана – Павлодар.

"Осындай бағдарламалық кешен Көкшетау – Астана тасжолында бұрын іске қосылған болатын және жолдағы құқық бұзушылықтарды тіркеуде жақсы нәтижелер көрсетіп жатыр.

Жоғарыда аталған жолдарда 25 тамыз сағат 00:00-ден бастап ZEREK-2 кешені штаттық режимде жұмыс істейтін болады.

Осы мүмкіндікті пайдалана отырып, барлық жүргізушіден жылдамдық режимін және автокөліктер арасындағы қашықтықты сақтауды сұраймыз", – дейді Ақтоты Боранова.

ІІМ дерегінше, жеті айда еліміздің жолдарында жеті мыңға жуық жол-көлік оқиғасы тіркелген, салдарынан 1200-ден астам адам қаза тауып, 8500-ге жуық адам түрлі дәрежеде жарақат алған.

Жеті мыңға жуық жол-көлік оқиғасының ішінде 730 жол-көлік оқиғасы қала сыртындағы трассаларда жылдамдық режимін сақтамаудан болған. Салдарынан 300-ден астам адам қаза тауып, 1200-ден астам адам зардап шеккен.

Мәтіннен қате тапсаңыз, бізге жазыңыз