"Үй тауып, сонда түнеп шыққан": құтқарушылар Талғар асуында адасып кеткен кореялық туристі тапты

Құтқарушылар 23 тамызда Алматы облысындағы Талғар асуында адасып кеткен шетелдік әйелді аман-есен тапты. Бұл туралы ТЖМ ресми сайтында хабарлады.

ТЖМ мәліметінше, 23 тамызда таңғы сағат 9-да Корея Республикасынан 25 адамнан тұратын делегация "Комби-1" аспалы жолымен көтеріліп, Талғар асуына жаяу жеткен. Гид туристерге бос уақыт берген және Шымбұлаққа түсу кезінде топтың бір мүшесінің жетіспейтіні белгілі болған.

Ведомство ақпаратынша, 24 тамызда құтқарушыларға консулдық өкіл жүгінген.

"Сағат 12:05-те әйелді іздеуге 7 адамнан, оның ішінде бір кинологиялық есептен тұратын ТЖМ РЖҚЖ (Республикалық жедел-құтқару жасағы) құтқарушылары шықты. Сағат 14:22-де құтқарушылар Сол жақ Талғардан туристті аман-есен тауып алды, ол адасып, аспалы жолмен түсуге үлгермей қалған. Сәті түсіп ол үй тауып алып, сонда түнеп шыққан. Шетелдік әйелге медициналық көмек қажет болған жоқ", - делінген хабарламада.

ТЖМ құтқарушылары туристік топпен бірге тауға шығу ережесін еске салды.

"Туристік құрамның қатарында міндетті түрде басшы болуы керек. Жүріп өтетін маршрутта топты таратып жіберуге болмайды. Қозғалыс қарқынын топтағы ең әлсіз адамға қарай анықтау қажет. Тек топ басшысының рұқсатымен ғана топтан ажырап кетуге немесе тұрақтауға болады", - деп ескертті құтқарушылар.