Маңғыстауда жартасқа ойып жазу қалдырған ақтөбелік шенеунік халықтан кешірім сұрады

Маңғыстаудағы Ыбықты сай шатқалындағы жартасқа қашап жазу қалдырған Ақтөбе қалалық зағиптар қоғамы мәдениет үйінің директоры Манас Көшербаев кешірім сұраған видео-үндеу түсіріп, Facebook-тегі парақшасында жариялады.

Манас Көшербаевтың сөзінше, Ыбықты Сай шатқалы - Маңғыстаудағы ең көрікті жерлердің бірі. Алайда ол видео-үндеуінде шатқалға барар жолдың нашарлығын, бұл жерде қоқыстың көптігін, жартастарда әдепсіз сөздер жазылғанын атап өтті.

"Дөрекі сөзді әдемі есімге айналдырмақ ниетім болды. Аңдаусызда жаза бастым, ағайын. "Жаңылмайтын жақ, сүрінбейтін тұяқ жоқ". Аса қатты сөкпеңіздерші. Тарихи жәдігерге қыл да болса қиянат қылу ойымда болған жоқ. Маңғыстау жұртының алдында, отандастардың алдында басымды иіп кешірім сұраймын", - деді мәдениет үйінің директоры.

Айта кетейк, әлеуметтік желіде Ыбықты Сай шатқалында ер адамның жартасты балтамен ойып, жазба қалдырып жатқаны түсірілген видео тарады. Облыс әкімдігінің баспасөз қызметі ер адамның Ақтөбе қалалық зағиптар қоғамы мәдениет үйінің директоры екенін растаған болатын.