Бурабайда жолға шығып кеткен сілеусін видеоға түсіп қалды

Бурабайда Қызыл кітапқа енген сілеусін видеоға түсіп қалды. Сирек кездесетін жануар жолға шыққан, ал орманшы оны камераға түсіріп үлгерген, деп хабарлады "Бурабай" ұлттық паркінің Instagram парақшасында.

Жұмыс күні біткеннен кейін үйіне қайтып келе жатқан "Бурабай" орман шаруашылығының инспекторы Әділхан Шаймерденов Ақылбай орман шаруашылығында сілеусінді кезіктірген.

"Терісінің түсі топырақпен және өсімдіктермен астасып, көзге әрең көрінсе де байқап қалғаныма таңғалдым. Телефонымды қосып үлгердім, ол да бір-екі секундта жалт бұрылып, қалың ағаштың ішіне қарғып кіріп кетті. Керемет жылдам екен", - деді орманшы.

Автордың жазуынша, түсірілген кадрларға қарағанда "Бурабай" ұлттық паркі сілеусіндер үшін өсіп-өнуге ыңғайлы мекен. Ол 2021 жылы бұл маңда бар-жоғы 9 сілеусін болғандығын, ал бүгінде олардың саны 39-ға жеткендігін атап өтті.