"Қатты жаңбыр, бұршақ": демалыс күндері Қазақстанда ауа райы қандай болады

Алдағы демалыс күндері Қазақстанның барлық аумағында жаңбыр жауады деп күтілуде. Кей өңірлерде бұршақ жаууы ықтимал, деп хабарлайды "Қазгидромет" РМК баспасөз қызметіне сілтеме жасаған KAZ.NUR.KZ.

Метеорологтардың мәліметінше, 9-11 қыркүйек аралығында Қазақстанның барлық аумағында найзағай ойнап, жаңбыр жаууы мүмкін.

Синоптиктердің болжамынша, еліміздің батысында, солтүстігінде, орталығында, оңтүстігі мен оңтүстік-шығысындағы таулы аймақтарда кей жерлерде қатты жаңбыр жауады. Сондай-ақ еліміздің кей өңірлерінде бұршақ жаууы ықтимал.

Мамандар жауын-шашын болғанмен, күн жылы болады деп болжады. Қазақстанның басым бөлігінде ауа температурасы күндіз +10...+20 градусқа дейін, республиканың шығысында, оңтүстігінде және оңтүстік-шығысында +20... +30 градусқа дейін көтеріледі.

Бүгін, 8 қыркүйекте еліміздің басым бөлігінде найғазай ойнап, жауын-шашын болатынын хабарлаған едік.