"Ертіс орманы" РММ-де ауқымды операция жүргізілді

Павлодар облысы ПД ұйымдасқан қылмысқа қарсы күрес басқармасының қызметкерлері "Ертіс орманы" ерекше қорғалатын аумағынан ағаштарды заңсыз кесу және ұрлау фактілерін анықтау бойынша жедел-іздестіру іс-шаралары кешенін өткізді, деп хабарлайды Polisia.kz.

Ақпараттық медиа-порталды жазуынша, 18 қыркүйекте облыстық прокуратураның үйлестіруімен "Ертіс орманы" резерваты бойынша ауқымды операция жүргізілген.

Полиция қызметкерлері "Ертіс орманы" РММ-де, Шалдай және Бесқарағай орманшылығында, сондай-ақ бірқатар басшының тұрғылықты жерлері бойынша 20-ға жуық санкцияланған тінту іс-шараларын жүргізген.

Тінту кезінде құжаттамадан басқа, атыс қаруы, оқ-дәрілер және өзге де заттай дәлелдемелер тәркіленген.

Басылым қазіргі уақытта Қылмыстық кодекстің 188-бабы 2-бөлігі бойынша сотқа дейінгі тергеу жүргізіліп жатқанын, болжам бойынша ағаштарды заңсыз кесуге "Ертіс орманы" РММ-нің лауазымды тұлғаларының қатысы болуы мүмкін екенін атап өтті.       

Басылым ҚПК-нің 201-бабына сәйкес өзге де ақпарат жарияланбайтынын мәлім етті.