Найзағай, жаңбыр, жел: алдағы күндері елімізде ауа райы қандай болады

Қазақстанда 25-28 қыркүйек аралығында жаңбыр жауып, найзағай ойнап, жел тұруы мүмкін. Бұл туралы "Қазгидромет" РМК ресми сайтында хабарлады.

Синоптиктердің болжауынща, алдағы күндері еліміздің солтүстік-батысында, солтүстігінде және орталығында ауа райы құбылмалы болмақ. Атап айтқанда, жаңбыр жауып, найзағай ойнап, екпінді жел соғуы ықтимал.

Бұл ретте Қазақстанның батысында күн ашық болады деп күтіледі. Түнде және таңертең республиканың оңтүстігі мен оңтүстік-шығысындағы таулы аудандарда тұман түседі деп болжанады.

Шығыста түнгі уақытта 1-3 градус үсік сақталады. Ал ауа температурасында айтарлықтай өзгеріс күтілмейді.