Қазақконцерт МКҰ неліктен алдағы аптаға жоспарланған концерттердің болмайтынын айтты

"Қазақконцерт" мемлекеттік концерттік ұйымында неліктен бір аптадан астам уақытқа жоспарланған концерттердің өтпейтінін түсіндірді, деп хабарлайды "Қазақконцерт" мемлекеттік концерттік ұйымы Facebook-тегі ресми парақшасында.

"Қазақконцерт" мемлекеттік концерттік ұйымы Facebook-тегі ресми парақшасының хабарлауынша, бұған дейін "Астана су арнасы" МКК 4-10 қазан күндері аралығында қала аумағында, соның ішінде "Роза Бағланова атындағы "Қазақконцерт" мемлекеттік концерттік ұйымы" МКҚК орналасқан Qazaqstan орталық концерт залының маңындағы аумақта су құбыры желілерінде техникалық жұмыстар жүргізетіні туралы хабарлаған болатын.

"Осы кезеңде су берілмейтініне байланысты "Роза Бағланова атындағы "Қазақконцерт" МКҰ" МКҚК әкімшілігі қонақтарды қабылдауға және бұл аралықта кез келген іс-шараны өткізуге мүмкіндік болмайды", - делінген Қазақконцерттің Facebook-тегі ресми парақшасының хабарламасында.

Роза Бағланова атындағы "Қазақконцерт" МКҰ-ның жоспарланған мынадай концерттері өткізілмейді:

• 4 қазан - "Халық қазынасы" ұлттық өнер орталығының солисі Әлихан Дүйсенбайдың концерті;
• 6 қазан - "Халық қазынасы" ұлттық өнер орталығының солисі Айзат Қарабектің концерті;
• 7 қазан - "Қазақконцерттің жас таланттары" концерті.

"Сонымен қатар 8 қазанға жоспарланған Максим Галкин концертінің ұйымдастырушысы техникалық жұмыстар жүргізілуіне байланысты мемлекеттік органның актісіне сәйкес, туындаған жағдай туралы ресми түрде хабарландырылғанын, келісімшартты біржақты бұзу туралы тиісті хабарлама жолданғанын хабарлаған.

2023 жылғы қазанның 4-10 күндері аралығына жоспарланған концерттік іс-шараларға билеттердің сатылымы тоқтатылуға, сатылған билеттер қайтарылуға тиіс.

Келтірілген қолайсыздықтар үшін тағы да кешірім сұраймыз", - делінген хабарламада.